کرونا وائرس کے پیش نظر حج کمیٹی آف انڈیا کے ذریعے رہنما ہدایت کے مطابق بہت سی تبدیلیاں کی گئی ہیں، اس سے متعلق ای ٹی وی بھارت کے نمائندے نے دہلی اسٹیٹ حج کمیٹی کے ایگزیکٹو آفیسر جاوید عالم خان سے بات چیت کی۔
اس دوران جاوید عالم خان نے بتایا کہ رواں برس کرونا کے مد نظر عمر کی حد بندی کی گئی ہے رواں برس 18 برس سے 65 برس کے عازمین ہی درخواست دے سکتے ہیں۔
اس بار پانچ عازمین کے بجائے صرف تین عازمین کا گروپ تشکیل دیا جائے گا، اس کے علاوہ عازمین زمرے کا انتخاب نہیں کر سکتے کیونکہ رواں برس عزیزیہ کے لیے ہی درخواست دے سکتے ہیں۔
حج کمیٹی آف انڈیا کی جانب سے جاری کردہ نئے ایکشن پلان میں یہ بات بھی بتائی گئی ہے کہ پہلے چالیس دنوں تک کے لئے حج کے ایام ہوا کرتے تھے مگر اب ان میں تھوڑی سی تخفیف کردی گئی ہے اور وہ 30 سے 35 دن رہیں گے۔
جاوید عالم خان نے بتایا کہ عازمین کو اس بار حج کی پہلی قسط 81 ہزار کے بجائے یک مشت ایک لاکھ پچاس ہزار روپے ادا کرنی ہو گی جبکہ پوری رقم تین لاکھ 75 ہزار روپے ہوگی جبکہ گزشتہ برس اگست میں یہ رقم تقریباً تین لاکھ 75 ہزار روپے ادا کرنی ہوگی۔
اس کے علاوہ ایک نئی تبدیلی یہ بھی ہے کہ گزشتہ برس 21 امبارکیشن پوائنٹ ہوا کرتے تھے جس میں کمی کرتے ہوئے 10 تک محدود کردیا گیا ہے۔ عازمین حج کی پروازیں 26 جون 2021 سے شروع ہوں گی اور واپسی کا آغاز 30 جولائی سے ہوگا۔
حج کمیٹی آف انڈیا نے سرکلر جاری کیا ہے نیز کرونا کے تحت بہت ساری تبدیلیاں کی گئی ہیں، بہرحال یہ بات تو طے ہوچکی ہے کہ حالات جو بھی ہوں حج2021 منسوخ نہیں کیا جائے گا۔
