'کشمیر میں فلسطین جیسے حالات ہوسکتے ہیں'

کانگریس کے سینیئر رہنما منی شنکر ائیر نے ای ٹی وی بھارت سے مسئلہ کشمیر پر کھل کر بات کی۔

منی شنکر ایئر نے آٹیکل 370 کی منسوخی کے بعد کشمیر کے فلسطین بن جانے والے اپنے ریمارکس پر صفائی پیش کی۔
انہوں نے کہا کہ 'کشمیریوں پر زور زبردستی کے ذریعہ کسی بھی فیصلہ کو نہیں تھوپا جانا چاہیے جبکہ فلسطینی عوام نے ہمیشہ یہودی مملکت کے ساتھ کسی بھی طرح کی سودے بازی کرنے سے انکار کیا ہے۔ فلسطینی عوام کسی بھی قیمت پر اپنی زمین چھوڑنے کےلیے تیار نہیں ہیں۔'

منی شنکر ایئر نے سوال کرتے ہوئے کہا کہ ’’کشمیر میں حالات معمول پر ہے تو مزید فورس کو کیوں تعینات کیا گیا، مواصلاتی نظام کو کیوں بند کردیا گیا، رپورٹرز اور سیاسی رہنماؤں پر کیوں پابندیاں عائد کی گئیں اور حکومت کی جانب سے فرضی تصاویر کو کیوں پیش کیا جا رہا ہے‘‘۔ منی شنکر ایئر نے وضاحت پیش کرتے ہوئے کہا کہ 'میں نہیں چاہتا کہ کشمیر میں فلسطین جیسے حالات ہوں لیکن میں یہ کہہ رہا ہوں کہ مودی حکومت کے متنازع فیصلوں سے ایسے حالات پیدا ہوسکتے ہیں۔'انہوں نے کہا کہ 'سپریم کورٹ کے تقریباً 5 فیصلوں سے ایسا محسوس ہوتا ہے کہ کورٹ، آرٹیکل 370 کے حق میں ہے۔'کانگریسی رہنما نے کشمیر کو بھارت کا اٹوٹ حصہ قرار دیتے ہوئے کہا کہ 'اس مسئلہ پر بین الاقوامی برادری دخل اندازی نہیں کرسکتی۔'