نئی دہلی: صدرجمہوریہ دروپدی مرمو نے جگر کو جسم کا حفاظتی محافظ قرار دیتے ہوئے بدھ کو کہا کہ ملک میں جگر سے متعلق صحت کے مسائل سنگین ہیں اور ان کی وجہ سے بڑی تعداد میں ہونے والی بیماریاں باعث تشویش ہیں۔ آج یہاں انسٹی ٹیوٹ آف لیور اینڈ بلیری سائنسز (آئی ایل بی ایس) کے نویں کانووکیشن سے خطاب کرتے ہوئے صدر نے کہا کہ احتیاطی صحت کی دیکھ بھال پر زیادہ توجہ دینے کی ضرورت ہے۔
انہوں نے کہا کہ یہ کہا جا سکتا ہے کہ جگر ہمارے جسم کا حفاظتی محافظ ہے۔ ہمارے ملک میں جگر سے متعلق صحت کے مسائل سنگین ہیں اور ان کی وجہ سے ہونے والی بڑی تعداد میں بیماریاں تشویش کا باعث ہیں۔ انہوں نے امید ظاہر کی کہ آئی ایل بی ایس جگر کی بیماریوں کی روک تھام میں اہم کردار ادا کرے گا۔ صدرجمہوریہ نے کہا کہ اعضاء کی ناکافی تعداد کی وجہ سے بہت سے مریض جگر، گردے یا کسی دیگر پیوند کاری سے محروم رہ جاتے ہیں۔ بدقسمتی سے، اعضاء کے عطیہ سے متعلق غیر اخلاقی عمل بھی وقتاً فوقتاً سامنے آتے رہتے ہیں۔ ان مسائل کو حل کرنا ایک باشعور معاشرے کی ذمہ داری ہے۔ ہمارے ملک میں لوگوں کو اعضاء عطیہ کرنے کی ترغیب دینے کے لیے بڑے پیمانے پر زیادہ سے زیادہ آگاہی مہم چلانے کی ضرورت ہے۔
یہ بھی پڑھیں: ڈاکٹروں کی عوام سے کووڈ سے بچنے کے لیے احتیاطی اقدامات کرنے کی اپیل
انہوں نے کہا کہ آئی ایل بی ایس نے عالمی سطح کی مہارت کے بل بوتے پر صرف 13 سال کے عرصے میں اپنی الگ شناخت بنائی ہے۔ انہوں نے کہا کہ ہندوستان آئی ایل بی ایس جیسے اداروں کی طاقت پر ایک بین الاقوامی صحت کی دیکھ بھال کا مرکز بن رہا ہے، جہاں نسبتاً کم قیمت پر عالمی معیار کی صحت کی دیکھ بھال کی خدمات فراہم کی جارہی ہیں۔
یو این آئی
