دارالحکومت دہلی میں مسلم اکثریتی علاقوں میں ترقیاتی کاموں کا فقدان دیکھنے کو ملتا رہا ہے۔ موجودہ صورتحال میں کیجریوال حکومت یہ دعوی کرتی رہی ہے کہ جب سے وہ اقتدار میں آئی ہے تب سے دہلی میں ترقیاتی کاموں کا اضافہ ہو رہا ہے لیکن اندرلوک کی عوام کے مطابق وہاں کوئی بھی کام نہیں کرایا گیا۔
ای ٹی وی بھارت کے نمائندے نے اندرلوک کے عوام سے بات کی جس میں مقامی افراد نے بتایا کہ پہلے ہمیں کانگریس نے وعدے کر کے مایوس کیا اور جب دہلی میں عام آدمی پارٹی نے سیاست شروع کی تو انہوں نے بھی ہمارے ساتھ کھلواڑ کیا۔
اندرلوک میں رہائش پذیر سماجی کارکن محمد کفیل انصاری نے بتایا جب وہ اندر لوک میں رہنے آئے تھے تب ایک پانی کی ٹنکی تھی جس سے علاقہ میں پانی کی سپلائی ہوا کرتی تھی تب اندرلوک کی آبادی محض 4 ہزار تھی لیکن اب آبادی کا تناسب 45 ہزار ہو گیا ہے لیکن پانی کی ٹنکی ابھی بھی وہی ہے۔
انہوں نے بتایا کہ متعدد بار مقامی رکن اسمبلی سے اس کی شکایت کی جا چکی ہے لیکن آج چھ برس گزرنے کے بعد بھی ہماری پریشانیوں کا حل نہیں ہو سکا ہے۔
وہیں ایک دیگر مقامی باشندے نے بتایا کہ علاقہ میں سر پر لٹکتا تاروں کا انبار ہے جس سے مقامی افراد کے سر پر خطرہ ہمیشہ منڈلاتا رہتا ہے، شکایت کے باوجود کوئی کارروائی نہیں کی گئی۔
