دہلی کے وزیر اعلیٰ اروند کیجریوال کی صدارت میں کابینہ نے ہفتہ کو سات نئے ہسپتالوں کی تعمیر کی منظوری دے دی ہے۔ سریتا وہار، شالیمار باغ، سلطان پوری، کراڑی، رگھوبیر نگر، جی ٹی بی ہسپتال اور چاچا نہرو چلڈرن ہاسپٹل میں اسپتال بنائے جائیں گے۔
اروند کیجریوال نے کہا کہ 'دہلی کے سرکاری ہسپتالوں میں تقریبا دس ہزار آئی سی یو بیڈ ہیں۔ نئے 6800 سے زیادہ بیڈ بڑھائے جانے کے بعد آئی سی یو بیڈ کی گنجائش میں تقریبا 70 فیصد کا اضافہ ہوگا۔'
انہوں نے کہا کہ 'اگر کورونا کی تیسری لہر آتی ہے تو اس وقت لوگوں کو علاج میں مدد ملے گی۔ اگر کورونا کی لہر نہیں آتی ہے تو دہلی کے لوگوں کے لیے مستقل طور پر 7000 نئے بستر تیار ہو جائیں گے۔'
یہ بھی پڑھیں: باراپولہ فیز 3 سے دہلی۔نوئیڈا کا سفر ہوا آسان: کیجریوال
وزیر صحت ستیندر جین نے کہا کہ 'دہلی حکومت شالیمار باغ، کراڑی، سریتا وہار، سلطان پوری، رگھوویر نگر، جی ٹی بی ہسپتال کے ساتھ ساتھ چاچا نہرو اسپتال میں 1216.72 کروڑ کی لاگت سے 6836 نئے بیڈ بنانے جارہی ہے۔ کیجریوال کی صدارت میں کابینہ نے اس پروجیکٹ کو منظوری دی ہے۔'
(یو این آئی)
