نئی دہلی: جمعیت علماء ہند اپنے قیام کے 100 برس مکمل کر چکا ہے۔ اسی مناسبت سے ملک کی مختلف ریاستوں میں تقاریب اور سمینار کا انعقاد کیا جا رہا ہے۔ اسی مناسبت سے قومی دارالحکومت دہلی میں واقع این ڈی ایم سی کے کنوینشن سینٹر میں دو روزہ سمینار اختتام پذیر ہوا۔ اس سمینار میں مولانا ارشد مدنی نے اپنے خیالات کا اظہار کرتے ہوئے کہا کہ ملک کی تقسیم کے بعد پوری جمعیت ایک امتحان سے گزری تھی۔ اس لیے کہ جمعیت علماء نے اپنوں کی گالیاں سنی، گلے میں جوتوں کے ہار ڈال دیے گئے مگر ملک کی تقسیم کو کبھی قبول نہیں کیا۔ Seminar by Jamiat Ulema e Hind in Delhi
انہوں نے کہا کہ 'تقسیم ہند کے بعد شمال ہند کی ریاستوں میں جس طرح سے قتل و غارت گری شروع ہوئی، اس میں مسلمانوں کو گاجر مولی کی طرح کاٹا جا رہا تھا۔ اس صورتحال کے اندر مولانا حفظ الرحمن سیوہاروی عوام کے تحفظ میں مصروف تھے۔ مولانا ارشد مدنی نے کہا کہ ان حالات کو دیکھتے ہوئے مولانا حفظ الرحمن سیوہاروی نے مولانا ابو الکلام آزاد سے کہا کہ دہلی میں امن نہیں رہ سکتا، اگر ایسا ہی چلتا رہا تو دہلی ختم ہو جائے گی۔ اس سے بچنے کی ایک ہی صورت ہے کہ دہلی کو جنوبی بھارت کی فوج کے حوالے کر دیا جائے ورنہ فرقہ پرست طاقتیں مسلمانوں کو دہلی میں زندہ نہیں رہنے دیں گی۔'
یہ بھی پڑھیں: Meeting of Jamiat Ulema Hind Bhopal بھوپال میں جمعیت علماء ہند کا اہم اجلاس
آخر کار مولانا ابو الکلام آزاد کو بات سمجھ آئی اور انہوں نے مہاتما گاندھی کی ذہن سازی کی جس کے بعد پنڈت جواہر لال نہرو کی ذہن سازی کی گئی اور اس کے بعد جنوب بھارت کی فوج کو دہلی کی ذمہ داری سونپی گئی جس کے بعد ملک اور دہلی میں امن کی فضا قائم ہو سکی۔ مولانا ارشد مدنی نے مزید کہا کہ آج بھارت میں سیکولرازم مر رہا ہے، جان نکل رہی ہے لیکن ابھی کہنے کے لیے ہی صحیح سیکولرازم زندہ ہے۔ چاہے عمل سیکولرازم کے خلاف ہیں لیکن زبان سے کہتے تو ہیں کہ بھارت ایک سیکولر ملک ہے۔'
