حکومت ہند کی جانب سے کورونا وائرس کے پھیلاؤ کو روکنے کے لیے اچانک لاک ڈاؤن کے اعلان ہونے اور بروقت کسی بھی جامع و مربوط ریلیف کا انتظام نہ ہونے کی وجہ سے ہزاروں غریب اور ضرورتمند فاقہ کشی کے دہانے پر پہنچ گئے۔ ان کی پریشانیوں کو دور کرنے کے لیے جماعت اسلامی ہند آگے آئی اور بلا تفریق مذہب و ملت ہزاروں شہریوں میں اشیائے خوردنی تقسیم کی اور دیگر ریلیف کا کام انجام دیا۔
میڈیا کو جاری کیے گئے ایک بیان میں جماعت اسلامی کے نیشنل سکریٹری برائے خدمت خلق محمد احمد نے کہا کہ 'اللہ کے کرم سے، خیر خواہوں کی حمایت اور رضاکاروں کی محنت کے نتیجے میں ہم اس لائق ہوئے کہ کھانا اور دیگر راحت کے کام کو ملک بھر کے لاکھوں لوگوں میں دستیاب کراسکے۔ استفادہ کرنے والوں میں انتہائی غریب، یومیہ کما کر پیٹ بھرنے والے مہاجر مزدور ہیں۔ یہ سب لاک ڈاؤن میں پھنس گئے تھے۔ مختلف ریاستوں، شہروں اور قصبوں سے جماعت کے رضاکاروں کے ذریعہ فراہم کی گئی رپورٹس کے مطابق ملک بھر میں تقریباً دس کروڑ روپے کی ریلیف کا کام 8,38,417 لوگوں میں انجام دیا گیا ہے۔ نیز جماعت نے 5,80,519 فوڈ کٹس، 4,32,228 تیار کھانے کے پیکٹس، 3,88,852 فیس ماسک اور 3,970 سینیٹائزر تقسیم کیے ہیں۔ اس کے علاوہ بھی 10,06,553 لوگوں کو مالی امداد اور 44,503 لوگوں کو دیگر سروسیز فراہم کی گئیں۔
نیشنل سکریٹری محمد احمد نے مزید کہا کہ 'جماعت ہمیشہ سے ہی زمینی و آسمانی آفات کے موقع پر ریلیف کا کام انجام دیتی رہی ہے۔ ریلیف اور باز آبادکاری کا یہ کام ہم بلا تفریق مذہب وملت تمام طبقوں میں انجام دیتے ہیں اور ہمارا عزم ہے کہ لاک ڈاؤن کے ختم ہونے تک ہم اپنا یہ کام جاری رکھیں گے'۔
