دہلی کے بازاروں پر کورونا کا اثر، دکاندار پریشان

کورونا وائرس کی مہلک وبا سے بین الاقوامی سطح پر معاشی بحران کے اثرات نمودار ہو رہے ہیں۔ ملک اور بیرون ملک کی معیشت خراب ہو گئی ہے، جس کا اثر دہلی کے بازاروں پر بھی دیکھنے کو مل رہا ہے۔

ایسے میں جب دنیا کے ترقی یافتہ ممالک کی اقتصادی صورتحال خراب ہے۔ وہیں بھارت کی معیشت میں 23 فیصد گراوٹ درج کی گئی ہے۔ ای ٹی وی بھارت کے نمائندے نے ایسے ہی ایک بازار کے دکانداروں سے بات کی، جس میں انہوں نے بتایا کہ، 'یہ پورا برس تو کورونا کی نذر ہو گیا اور آئندہ برس بھی کاروبار چلنے کی کوئی صورت نظر نہیں آ رہی ہے۔'

ای ٹی وی بھارت کے نمائندے نے دارالحکومت دہلی کے اندرلوک علاقے میں واقع کولر مارکیٹ کے دکانداروں سے بات کی، جس میں انہوں نے بتایا کہ، 'جب ہمارے کاروبار کے سیزن کا آغاز ہوا تھا، تبھی کورونا کی وبا ملک بھر میں پھیل گئی جس کے بعد مرکزی حکومت کی جانب سے ملک گیر سطح پر لاک ڈاؤن نافذ کر دیا گیا۔ اب جب لاک ڈاؤن کھولا تو بازار سے خریدار ندارد ہیں۔'

انہوں نے مزید بتایا کہ، 'ستمبر ماہ سے آئندہ برس کی تیاری شروع ہو جاتی ہے، لیکن موجودہ برس جو مال گوداموں میں بھرا تھا وہ ویسا ہی رکھا رہ گیا، اب امید بھی نہیں ہے کہ آئندہ برس یہ سامان فروخت ہوگا یا نہیں۔'