کانگریس پارٹی کے سینئر رہنما طارق انور نے قومی دارالحکومت دہلی میں کہا کہ سپریم کورٹ پہلے بھی متعدد بارمذاکرات کے لیے کوششیں کرچکی ہے، لیکن مذاکرات کے ذریعہ کوئی راستہ نہیں نکل سکا۔
مذاکرات سے کوئی راہ نکلتی ہے تو بہتر
انہوں نے ای ٹی وی بھارت سے بات کرتے ہوئے کہا کہ اگر مذاکرات سے کوئی راہ نکلتی ہے تو بہتر ہے، ورنہ دونوں فریق دوبارہ بات کرسکتے ہیں اور مذاکرات کے لیے تیار ہوسکتے ہیں۔ انہوں نے کہا کہ اگر مذاکرات میں ناکامی ہوتی ہے تو سپریم کورٹ آزاد ہے، اس کا جو بھی فیصلہ ہوگا قابل قبول ہے۔
ایک سوال کے جواب میں انہوں نے کہا کہ مذاکرات کی کئی کوششیں ناکام ہوچکی ہیں، کیونکہ معاملہ بھی بہت پیچیدہ ہے اور کچھ سیاسی پارٹیاں اس کا فائدہ اٹھانے کی کوشش کررہی ہیں، لیکن مجھے محسوس ہوتا ہے کہ سپریم کورٹ کا فیصلہ سب کے لیے قابل قبول ہوگا۔
