قومی دارالحکومت دہلی میں ملک میں تیزی سے پھیلنے والے کورونا وائرس پر تشویش کا اظہار کرتے ہوئے سپریم کورٹ نے بدھ کے روز کہا کہ ہم جدید ترین اسلحہ بناسکتے ہیں، لیکن وائرس سے لڑ نہیں سکتے۔
جسٹس ارون مشرا کی سربراہی میں ڈویژن بینچ نے اس پر تشویش کا اظہار کرتے ہوئے کہا کہ 'ہر 100 برس میں اس طرح کی وبا پھیلتی ہے'۔
جسٹس مشرا نے کہا جب یہ وبا پھیلتی ہے تو 'انسان کی حیثیت ان وائرس کے سامنے کمتر پڑ جاتی ہے، آپ ہتھیار تو بناسکتے ہیں لیکن آپ اس مہلک وائرس سے لڑ نہیں سکتے'۔
واضح رہے کہ انہوں نے ایک سماعت کے دوران عدالت میں وکیلوں کے ہجوم سے متعلق یہ تبصرہ کیا۔
انہوں نے مزید کہا 'اس طرح کی وبا ہر 100 برس بعد پھیلتی ہے، کل یگ میں ہم اس وائرس سے لڑ نہیں سکتے۔
انہوں نے کہا 'انسان کی کمزوری دیکھو! آپ ہتھیار تو بناسکتے ہیں،لیکن آپ اس طرح کے وائرس سے لڑ نہیں سکتے ہیں۔ اس لیے ہمیں اپنی سطح پر ان سے لڑنے کی ضرورت ہے'۔
