نئی دہلی: وزارت داخلہ نے مبینہ 'فیڈ بیک یونٹ' جاسوسی کیس میں دہلی کے نائب وزیر اعلی منیش سسودیا کے خلاف انسداد بدعنوانی ایکٹ کے تحت مقدمہ چلانے کے لئے بدھ کو مرکزی تفتیشی بیورو (سی بی آئی) کو منظوری دے دی۔ سسودیا شراب پالیسی کیس میں پہلے ہی سی بی آئی کے ریڈار پر ہیں۔سی بی آئی کی رپورٹ کے مطابق، عام آدمی پارٹی (اے اے پی) نے 2015 میں دہلی میں اقتدار میں آنے سے پہلے سیاسی انٹیلی جنس اکٹھا کرنے کے لیے ایک فیڈ بیک یونٹ تشکیل دیا تھا اور سسودیا اس یونٹ کے سربراہ تھے۔ دریں اثنا، اے اے پی نے پہلے ان الزامات کو مسترد کر دیا تھا۔
دہلی بھارتیہ جنتا پارٹی (بی جے پی) نے رد عمل ظاہر کرتے ہوئے اس معاملے میں منیش سسودیا کے خلاف مقدمہ چلانے کی منظوری دینے کے وزارت داخلہ کے فیصلے کا خیر مقدم کیا۔ بھارتیہ جنتا پارٹی کے ریاستی ورکنگ صدر وریندر سچدیوا نے ایک پریس کانفرنس سے خطاب کرتے ہوئے کہا کہ سی بی آئی (سنٹرل بیورو آف انویسٹی گیشن) کو فوری طور پر منیش سسودیا کو گرفتار کرنا چاہئے اور اس کے بدعنوانی کے اصل ملزم وزیر اعلی اروند کیجریوال کی جانچ ہونی چاہئے۔ انہوں نے کہا کہ دہلی کے لوگوں نے بھی اس فیصلے کا خیر مقدم کیا ہے اور ہمیں یقین ہے کہ منیش سسودیا اس الزام میں جیل جائیں گے۔
یو این آئی
