دہلی میں پینے کے پانی کے لئے دربدر بھٹکنے پر مجبور

خواتین کا کہنا ہے کہ 'دہلی حکومت غریب بے سہارا لوگوں کو کھانا مہیا کررہی ہے، کھانے کے ساتھ ساتھ پینے کا پانی بھی وقت پر مہیا کرا دے تو لوگوں کی مشکلات پر قابو پایا جاسکتا ہے۔

قومی دارالحکومت کے مشرقی دہلی کے مصطفیٰ آباد اسمبلی حلقہ کے شیو وہار فیز 3 کے رہائشی پینے کے پانی کے لئے در بدر کی ٹھوکریں کھانے پر مجبور ہیں۔

مقامی لوگوں کا کہنا ہے کہ 5 دن میں ٹینکر آتا ہے جس کی وجہ سے لوگوں کو وافر مقدار میں پانی نہیں مل پاتا ہے۔ جس کے باعث لوگوں کو پینے کے پانی کے لئے ادھر ادھر بھٹکنا پڑتا ہے۔

انہوں نے بتایا کہ 'علاوہ ازیں پانی کے لئے گھنٹوں قطار میں کھڑے رہنا پڑتا ہے۔ پانی کی عدم فراہمی کے باعث لوگ پینے کا پانی خریدنے کے لئے مجبور ہیں یا پھر سمر سیبل کا کھارا پانی پینے پر مجبور ہیں۔'

لوگوں کا یہ بھی کہنا ہے کہ 'علاقے میں پینے کے پانی کی لائن 4 سال سے بچھی ہوئی ہیں لیکن دہلی حکومت پینے کے پانی کی لائنوں کو شروع کرنے سے قاصر ہے۔ جس کی وجہ سے شدید گرمی میں لوگ اس تکلیف میں مبتلا ہیں۔