ریاست میں گزشتہ کچھ دنوں سے جاری بارش کی وجہ سے اس برس تیسری مرتبہ آسام کو سیلابی صورت حال کا سامنا کرنا پڑرہا ہے۔
سیلاب کی تازہ صورت حال کی وجہ سے 1.80 لاکھ افراد کے متاثر ہونے کے علاوہ ایک شخص کے ہلاک ہونے کی اطلاع ہے۔
آسام ڈیزاسٹر مینجمنٹ اتھارٹی کی ڈیلی سیلاب رپورٹ کے مطابق ضلع ناگون کے کمپور میں ایک شخص کی پانی میں ڈوبنے سے موت ہوگئی ہے۔
اس برس سیلاب کی وجہ سے ہلاک ہونے والوں کی تعداد 118 ہوگئی ہے۔
اتھارٹی نے کہا کہ سیلاب کی وجہ سے دھیماجی، لکھیم پور، ناگون، موریگاؤں اورمغربی کاربی انگلونگ ضلع کے 1.78 لاکھ سے زائد افراد متاثر ہوئے ہیں۔
انہوں نے کہا کہ اس وقت 155 گاؤں سیلاب کی لپیٹ میں ہیں اور 6،437 ہیکٹر میں پھیلی فصل تباہ ہوگئی ہے۔
محکموں نے سیلاب سے متاثرہ افراد کے لیے 25 امدادی کیمپ لگائے ہیں۔
