دہلی: دہلی کی ساکیت عدالت نے جامعہ تشدد کیس میں شرجیل امام کو بری کر دیا، جب کہ آصف اقبال تنہا کو بھی بری کر دیا ہے۔ ان کے خلاف درج کی گئی ایف آئی آر میں فسادات اور غیر قانونی اجتماع کے جرائم کا الزام لگایا گیا تھا۔ ساکیت عدالت نے ہفتہ کو شرجیل امام اور آصف اقبال تنہا کو دسمبر 2019 میں جامعہ ملیہ اسلامیہ میں تشدد کے واقعات سے منسلک ایک کیس میں بری کر دیا ہے۔
اطلاعات کے مطابق ایڈیشنل سیشن جج ارول ورما نے یہ حکم سنایا ہے۔ تاہم شرجیل امام اب بھی 2020 کے شمال مشرقی دہلی فسادات سے متعلق اپنے خلاف درج دیگر ایف آئی آر میں زیر حراست رہیں گے۔ شرجیل امام اور آصف اقبال تنہا دونوں اسپیشل سیل کے معاملے میں ملزم ہیں جس میں الزام لگایا گیا ہے کہ 2020 کے شمال مشرقی دہلی فسادات کے پیچھے ایک بڑی سازش تھی۔ بتادیں کہ شہریت ترمیمی قانون کے خلاف احتجاج کررہے مظاہرین اور پولیس کے درمیان جھڑپ کے بعد دہلی پولیس نے شرجیل امام پر تشدد بھڑکانے کی سازش کا الزام لگایا تھا۔ پولیس نے الزام لگایا تھا کہ 2019 میں جامعہ نگر میں تشدد شرجیل امام کی تقریر کی وجہ سے ہوا تھا۔ تاہم دہلی فسادات سے متعلق ایک کیس میں ضمانت کی عرضی دہلی ہائی کورٹ میں زیر التوا ہے۔ جامعہ تشدد کیس میں شرجیل امام کے خلاف فسادات اور غیر قانونی اجتماع کی دفعات کے تحت مقدمہ درج کیا گیا تھا جس میں آئی پی سی کی دفعہ 143، 147، 148، 149، 186، 353، 332، 333، 308، 427، 435، 323، 341، 120B اور 34 شامل تھیں۔ ساتھ ہی آصف اقبال تنہا کو بھی اسی کیس میں بری کیا گیا ہے۔
