'دہلی جرائم کا گڑھ بن چکا'

دہلی میں خاتون صحافی سے لٹیروں نے موبائل چھینا اور اس دوران چلتے ہوئے آٹو رکشہ سے باہر گرنے کے بعد صحافی زخمی ہوگئی جس پر سواتی مالیوال نے دہلی پولیس سے مجرموں کو جلد گرفتار کرنے کو کہا۔

دار الحکومت دہلی میں ان دنوں دہلی خواتین کمیشن کی صدر سواتی مالیوال کافی سرگرم ہیں۔ سواتی مالیوال نے اپنے ایک بیان میں کہا کہ دہلی پولیس مجرموں کو جلد گرفتار کرے اور ان کو سخت سے سخت سزا دے تاکہ ایسا واقعہ پھر دوبارہ نہ ہو۔
انہوں نے کہا کہ متاثرہ کی حالت بہت خراب ہے اور اس کو بہت زیادہ چوٹیں آئی ہیں اور دہلی پولیس کو چاہئے کہ وہ مجرموں کو گرفتار کرے تاکہ متاثرہ کو انصاف مل سکے۔
انہوں نے کہا کہ دہلی خواتین کمیشن دہلی پولیس کو نوٹس جاری کرے گی کہ ابھی تک مجرموں کو کیوں نہیں گرفتار کیا گیا ہے۔ دہلی پولیس مجرموں کو جلد سے جلد گرفتار کرے اور سخت سے سخت سزا دے۔
انہوں نے کہا کہ یہ جو جرائم بڑھ رہے ہیں دہلی پولیس کی ناکامی کی وجہ سے ہے۔ اگر پولیس ٹھیک سے کام کرنے لگ جائے تو اس طرح کے واقعات ہو ہی نہیں سکتا۔
بتا دیں کہ اتوار کی شام کو جنوبی دہلی کے سی آر پارک میں دو موبائل لٹیروں سے اپنے موبائل فون کی حفاظت کی کوشش میں خاتون صحافی زخمی ہوگئی۔ دونوں لٹیرے موٹر سائیکل پر سوار تھے اور موبائل فون چھین کر فرار ہوگئے۔
نیوز ایجنسی کے ساتھ کام کرنے والی 26 سالہ صحافی جویمالا باغچی کی جبڑے کی ہڈی ٹوٹ گئی اور سیل فون کو بچانے کی کوشش کرتے ہوئے چلتے ہوئے آٹو رکشہ سے باہر گرنے کے بعد اس کے چہرے، کہنی اور دیگر مقامات پر متعدد چوٹیں آئی ہیں۔