قومی دارالحکومت دہلی کے مسلم اکثریتی علاقوں میں ترقیاتی کاموں کا فقدان دیکھنے کو ملتا رہا ہے۔ موجودہ صورتحال میں کیجریوال حکومت یہ دعوی کرتی ہے کہ جب سے وہ اقتدار میں آئی ہے تب سے دہلی میں ترقیاتی کاموں میں اضافہ ہوا ہے لیکن اِندرلوک کی عوام کے مطابق وہاں ترقیاتی منصوبے تو دور بنیادی سہولیات کا بھی فقدان ہے۔
ای ٹی وی بھارت کے نمائندے نے اندرلوک کی عوام سے بات کی جس میں مقامی افراد نے بتایا کہ کسی بھی سیاسی پارٹی نے ان کے لیے کام نہیں کیا۔ پارٹیاں ووٹ تو لے لیتی ہیں لیکن علاقہ میں کام کرانے کے وقت غائب ہوجاتی ہیں۔
اندرلوک کے سماجی کارکن محمد کفیل انصاری نے بتایا جب وہ اندر لوک میں رہنے آئے تھے تب سے اب تک اندرلوک کو یکسر نظر انداز کیا گیا ہے۔ سیاسی رہنماؤں نے مسلمانوں کا سیاست کے نام پر استحصال کیا ہے۔
انہوں نے بتایا کہ متعدد بار مقامی رکن اسمبلی سے اس کی شکایت کی جا چکی ہے لیکن آج 6 برس گزرنے کے بعد بھی ہماری پریشانیوں کا حل نہیں مل سکا ہے۔
وہیں ایک دیگر شخص نے بتایا کہ علاقہ میں گندگی کا انبار لگا رہتا ہے۔ پینے کا پانی بھی دستیاب نہیں ہے۔ سڑکیں ٹوٹی ہوئی ہیں اور مقامی ایم ایل اے سے کئی بار شکایت کے باوجود کوئی اقدام نہیں کیا گیا۔
