دسویں اور بارہویں امتحانات کی فیس معافی کی درخواست پر سماعت آج

ہائی کورٹ میں دائر درخواست میں کہا گیا ہے کہ زیادہ تر والدین اپنی ملازمت سے ہاتھ دھو بیٹھے ہیں، یا دوبارہ نئی ملازمت حاصل کررہے ہیں۔ان والدین کے لیے یہ ممکن نہیں ہے کہ وہ اپنے بچوں کی دسویں اور بارہویں کے امتحانات کی فیس سی بی ایس ای کو دے سکیں

دسویں اور بارہویں کے طلبا کے اس سیشن کے امتحانات کی فیس معافی کا مطالبہ کرنے والی درخواست پر آج دہلی ہائی کورٹ شنوائی کرے گا۔

درخواست این جی او سوشل جیورسٹ کی جانب سے ایڈوکیٹ اشوک اگروال نے دائر کی ہے، چیف جسٹس ڈی این پٹیل کی سربراہی والی بینچ اس درخواست پر سماعت کرے گی۔

درخواست میں کہا گیا ہے کہ کورونا وبا اور لاک ڈاؤن کی وجہ سے والدین کی آمدنی ختم ہوگئی ہے یا اس میں کمی واقع ہوئی ہے۔والدین کو دو وقت کی روٹی کے لیے بھی کافی مشکلات کا سامنا کرنا پڑرہا ہے، سرکاری اور نجی اسکولوں میں بچوں کو پڑھائی کے لیے بھیجنے والے والدین پر کورونا کا زبردست اثر پڑرہا ہے، نجی اسکول کی فیس بھی جمع نہیں ہوپا رہی ہے۔

درخواست میں کہا گیا ہے کہ زیادہ تر والدین اپنی ملازمت سے ہاتھ دھو بیٹھے ہیں، یا دوبارہ نئی ملازمت حاصل کررہے ہیں۔ان والدین کے لیے یہ ممکن نہیں ہے کہ وہ اپنے بچوں کی دسویں اور بارہویں کے امتحانات کی فیس سی بی ایس ای کو دے سکیں۔کورٹ سرکار کو یہ حکم جاری کرے کہ وہ دسویں اور بارہویں میں زیر تعلیم طلبا کی فیس ادا کریں۔تعلیمی سیشن 2018-19 تک سی بی ایس ای امتحانات کی فیس کم ہوتی تھی لیکن 2019-20 سے فیس بڑھا دی گئی ہے۔