دہلی: حج بیت اللہ 2023 کے لیے حج پروازوں کا سلسلہ شروع ہونے میں اب صرف 16 دن باقی رہ گئے ہیں۔ ایسے میں بھارت کے سب سے بڑے ایمبارکیشن پوائنٹ دہلی سے آئندہ 21 مئی 2023 سے عازمین حج کی روانگی کے لیے دہلی اسٹیٹ حج کمیٹی کی جانب سے مختلف سطحوں پر تیاریوں کا سلسلہ زور و شور سے چل رہا ہے۔ اسی سلسلے میں آج وزارتِ شہری ہوا بازی، حکومت ہند کے سکریٹری راجیو بنسل اور وزارت اقلیتی بہبود کے جوائنٹ سکریٹری کے ساتھ وزارتِ شہری ہوا بازی کے دفتر میں ایک خصوصی میٹنگ کا انعقاد کیا گیا۔
اس میٹنگ میں دہلی اسٹیٹ حج کمیٹی کی چیئرپرسن کوثر جہاں نے حج بیت اللہ کے لیے روانہ ہونے والے دہلی اور اس کے علاوہ دیگر چھ ریاستوں کے عازمین کو بہتر سے بہتر سہولیات کی فراہمی کو یقینی کو بنانے کے لیے متعلقہ افسران سے تفصیلی تبادلہ خیال کیا۔ اس میٹنگ میں حج کمیٹی آف انڈیا کے چیف ایگزیکٹو آفیسر یعقوب شیخا، اندرا گاندھی بین الاقوامی ایئرپورٹ کی مختلف اٹھارتی کے افسران کے علاوہ دہلی اسٹیٹ حج کمیٹی کے ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی نے بھی مختلف امور پر اظہار خیال کیا۔
واضح رہے کہ ابھی تک عازمین حج کے لیے پروازوں کا شیڈول طے نہیں ہو پایا ہے جبکہ حج 2023 کے لیے پہلی پرواز 21 مئی سے جانی ہیں۔ جس میں 17 دن ہی باقی ہے۔ ایسے میں اگر حج کمیٹی آف انڈیا نے اور وزارت اقلیتی امور نے مستعدی نہیں دکھائی تو عازمین حج کو پریشانیوں کا سامنا کرنا پڑ سکتا ہے۔
