نئی دہلی: عام آدمی پارٹی کے قومی کنوینر اروند کیجریوال نے وزیر اعظم نریندر مودی پر براہ راست حملہ کرتے ہوئے کہا کہ منی پور کے واقعہ نے پورے ملک کے لوگوں کی روح کو ہلا کر رکھ دیا ہے۔ یہاں تیاگ راج اسٹیڈیم میں منعقدہ ایک پروگرام کے بعد نامہ نگاروں سے بات کرتے ہوئے اروند کیجریوال نے جمعرات کو کہا کہ منی پور کے اندر گزشتہ چند مہینوں سے جس طرح کی صورتحال ہے وہ تشویشناک ہے۔ مرکزی حکومت بالخصوص وزیر اعظم نے اس پر کبھی کچھ نہیں بولا، یہ بھی بہت سنگین معاملہ ہے۔ اس واقعہ کے حوالے سے کوئی کارروائی نہیں کی گئی۔ وائرل ویڈیو کے بارے میں کیجریوال نے کہا کہ یہ صاف نظر آرہا ہے کہ دو بہنوں کی برہنہ پریڈ کی گئی۔ ان کے ساتھ اجتماعی زیادتی کی گئی۔
اس ویڈیو نے پورے ملک کی روح کو ہلا کر رکھ دیا ہے۔ اب معلوم ہوا ہے کہ ویڈیوز حالیہ نہیں بلکہ ڈھائی ماہ پرانی ہیں۔ وہاں کی ریاستی حکومت نے ڈھائی ماہ میں کچھ نہیں کیا۔ یہ انتہائی شرمناک اور مجرمانہ معاملہ بن جاتا ہے۔ انہوں نے کہا کہ انہیں بڑے دکھ کے ساتھ کہنا پڑتا ہے کہ منی پور حکومت اور مرکزی حکومت اس کے لئے ذمہ دار ہے۔ اکثر دیکھا گیا ہے کہ جب بھی ملک میں ایسے واقعات ہوتے ہیں تو وزیراعظم خاموش رہتے ہیں۔ یہ کمزور لیڈر کی نشانی ہے۔ جب کوئی مسئلہ درپیش ہوتا ہے تو ایک کمزور لیڈر خاموشی سے اپنے کمرے میں بیٹھ جاتا ہے۔ جب کہ جب کوئی مشکل پیش آتی ہے تو دلیر لیڈر سامنے آتا ہے۔
یہ بھی پڑھیں: Manipur Women Paraded خواتین کی برہنہ پریڈ، اجتماعی جنسی زیادتی، قتل و غارت گری، جانیے پورا واقعہ
یو این آئی
