دہلی کے وزیراعلی اروند کیجریوال نے اعلان کیا ہے کہ جو بچے کورونا وائرس کے سبب یتیم ہوئے ہیں انہیں 25 برس کی عمر تک حکومت 2500 روپے ماہانہ بطور پنشن دےگی۔
وزیر اعلی اروند کیجریوال نے آج ایک پریس کانفرنس سے خطاب کرتے ہوئے 4 نئے اعلان کئے ہیں۔ ان کا کہنا ہے کورونا وائرس کی وبائی بیماری کے باعث دہلی میں لاک ڈاؤن نافذ کرنا پڑا جس کی وجہ سے روز مرہ کے اخراجات اٹھانے والے غریب خاندانوں کو معاشی بحران سے دو چار ہونا پڑ رہا ہے۔
اسی کے مد نظر دہلی حکومت نے ان کی مدد کے لیے 72 لاکھ راشن کارڈ ہولڈر کو مفت راشن دینے کا اعلان کیا ہے، جس کے پاس راشن کارڈ نہیں ہے انہیں بھی راشن مفت میں دیا جائے گا.
اس کے علاوہ ان خاندانوں کے لئے بھی مالی معاوضے کا اعلان کیا ہے جن کے گھر سے کسی کی کورونا سے موت ہوگئی ہے انہیں 50 ہزار روپے بطور معاوضہ دیا جائے گا. جن کے والدین اس وائرس کی وجہ سے فوت ہوگیے ہیں۔ ان بچوں کو 2500 روپے ماہانہ پینشن اور 50 ہزار روپے بطور معاوضے کے ساتھ ساتھ بچوں کے لئے مفت تعلیم کا بھی انتظام کیا جائے گا۔ان بچوں کو پینشن کی رقم 25 برس کی عمر تک دہلی حکومت کی جانب سے دی جائے گی۔
