راجناتھ سنگھ نے مشرقی دہلی کے کونڈلی اسمبلی حلقہ میں بی جے پی امیدوار راجکمار ڈھلوں کے حق میں انتخابی اجلاس سے خطاب کرتے ہوئے کہا کہ ہماری حکومت جو کہتی ہے وہ کرتی ہے۔
سنگھ نے کہا کہ عام آدمی پارٹی کی حکومت نے پانچ برسوں میں اپنا کوئی بھی وعدہ پورا نہیں کیا۔ بی جے پی کی حکومت جو کہتی ہے اسے پورا کرتی ہے۔
راجناتھ سنگھ کا کہنا ہے کہ بی جے پی نے ایک ملک میں دو نشان، دو قانون اور دو سربراہان کا خاتمہ کرتے ہوئے ایک بھارت اور بہترین بھارت بنایا ہے۔
انھوں نے کہا کہ 'میں کونڈلی اسمبلی حلقہ کے امیدوار راجکمار ڈھلوں کے لیے یہاں آیا ہوں راجکمار ڈھلوں ایک ایسے امیدوار ہیں جن کے پاس کوئی جائداد نہیں ہے اور وہ خود جھگی میں رہتے ہیں۔ عام آدمی پارٹی کے امیدوار کروڑ پتی ہیں اور اگر ہمارے امیدوار کو الیکشن لڑنا ہوتا ہے وہ عوام سے چندہ لیکر الیکشن لڑتے ہیں، میں سمجھتا ہوں کہ کونڈلی اسمبلی حلقہ سے راجکمار ڈھلوں کی جیت یقینی ہے'۔
انہوں نے یہ بھی کہا کہ سنہ 2022 تک ملک کے تمام لوگوں کو پکا مکان دینے کا کام مکمل کرلیا جائے گا ساتھ ہی تمام گھروں میں نل سے صاف پینے کا پانی بھی دستیاب کرا دیا جائے گا۔ کسی کو یقین نہیں تھا کہ مودی حکومت گھر گھر میں بیت الخلا بنائے گی۔ ملک میں دیہی علاقوں میں بیت الخلا کی تعمیر کراکر موجودہ حکومت نے خواتین کا احترام کیا ہے۔
