کورونا متاثرین کی خدمت کرنے والے عارف کی کورونا سے موت

کورونا جیسی مہلک وبا کے اس دور میں جب اپنے ہی لوگوں نے منہ موڑ لیا تھا تب ایک ایسا شخص تھا جو کورونا مریضوں کے ساتھ ہمیشہ کھڑا رہا۔ بات چاہیں متاثرہ افراد کو اسپتال پہنچانے کی ہو یا مریض کی موت کے بعد ان کے آخری رسومات کی۔ عارف خان نامی شخص کبھی پیچھے نہیں ہٹا۔ حالانکہ وہ بھی اس وبائی مرض سے نہیں بچ سکا اور کورونا کے خلاف جنگ لڑتے ہوئے فانی دنیا کو الوداع کہہ دیا۔ان کے انتقال پر نائب صدرجمہوریہ وینکیا نائڈو نے دکھ کا اظہار کیا ہے۔

ایمبولینس ڈرائیور عارف نے اپنی جان کو خطرے میں ڈال کر سینکڑوں کورونا کے مریضوں کو بروقت اسپتال پہنچایا اور 200 سے زائد لاشوں کو آخری رسومات کے لیے قبرستان پہنچانے کا کام کیا۔

صرف یہی نہیں، عارف نے ایسے بہت سے خاندانوں کی مالی مدد بھی کی، جن کے پاس جنازے کے اخراجات کے لیے بھی پیسہ نہیں ہوا کرتے تھے۔

عارف نے ایسی لاشوں کی بھی آخری رسومات ادا کی، جن کے اہل خانہ کورونا وائرس سے انفیکٹڈ ہونے کی وجہ سے باہر نہیں آ سکتے تھے۔

ای ٹی وی بھارت کے نمائندے نے شہید بھگت سنگھ خدمت دل کے بانی جتیندر سنگھ شانتی سے فون پر اس سلسلے میں بات کی، جس میں انہوں نے بتایا کہ مسلمان ہونے کے باوجود عارف نے 100 سے زائد ہندؤں کی لاشوں کا اپنے ہاتھوں سے آخری رسومات ادا کی۔

وہ 24 گھنٹے کورونا سے متاثرہ مریض کے لیے دستیاب رہتے تھے اور میرے ساتھ ہی پارکنگ میں رات گزارتے تھے۔