قومی دارالحکومت دہلی سے نوئیڈا آمدورفت والوں کی ڈی این ڈی (دہلی-نوئیڈا بارڈر) پر کورونا کی رینڈم ٹیسٹ کا آغاز کردیا گیا ہے، اور لوگوں کو روک کر ان کا کورونا ٹیسٹ کیا جا رہا ہے۔
موقع پر پولیس فورس بھی تعینات ہے جو مشکوک افراد اور کار ڈرائیورز کو روک کر ان سے کورونا رینڈم ٹیسٹ کرنے کی درخواست کررہی ہے۔
خیال رہے کہ 50 برس سے زیادہ عمر کے لوگوں پر خصوصی توجہ دی جا رہی ہے۔
بتایا جارہا ہے کہ محکمہ صحت کی ایک ٹیم ڈی این ڈی ٹول پلازہ پر موجود ہے اور ایک ٹیم چیلا ریگولیٹر بارڈر پر تعینات ہے۔ دونوں سرحدوں پر رینڈم کورونا ٹیسٹنگ کا سلسلہ جاری ہے۔
صورتحال کا جائزہ لینے کے لیے سی ایم او ڈاکٹر دیپک اوہری ڈی این ڈی ٹول پلازہ پر موقع پر موجود ہیں، نیز مقامی پولیس افسران بھی موقع پر پہنچ رہے ہیں۔
واضح رہے کہ ڈرائیورز کو روکنے پر ٹول پلازہ پر گاڑیوں کی طویل قطاریں لگ گئیں، تاہم بہت سے کار ڈرائیور نے اس رینڈم چیکنگ کی مخالفت کی ہے، کیوں کہ ان لوگوں کا کہنا ہے کہ اس سے انہیں آفس پہنچنے میں تاخیر ہوگی۔
ضلع انتظامیہ دہلی این سی آر میں کورونا کے بڑھتے ہوئے معاملات کے حوالے سے سخت ہوگئی ہے۔
ڈسٹرکٹ مجسٹریٹ سہاس ایل وائی نے محکمہ صحت کو ہدایت کی ہے کہ وہ ڈی این ڈی فلائی وے اور چیلا ریگولیٹر بارڈر سے نوئیڈا جانے والے ہر مشتبہ افراد کا اینٹیجن ریپڈکٹ سے کورونا ٹیسٹ کرایا جائے۔
