چیف جسٹس رنجن گگوئی کی صدارت والی بینچ نے کہا کہ کانگریس رہنما کی درخواست پر منگل کو سماعت کی جائے گی۔
درخواست میں کہا گیا ہے کہ آل انڈیا خواتین کانگریس کی صدر اور رکن پارلیمان دیو کی جانب سے وزیراعظم مودی اور بی جے پی کے صدر امت شاہ کے خلاف انتخابی ضابطہ اخلاق کی خلاف ورزی کی کئی بار شکایت کیے جانے کے باوجود الیکشن کمیشن کوئی قدم نہیں اٹھا رہا ہے۔
رکن پارلیمان کی جانب سے عدالت میں موجود کانگریس کے رہنما اور سینیئر وکیل ابھیشیک منو سنگھوی نے کہا 'بی جے پی کے صدر اور وزیر اعظم نے اپنی تقریروں کے دوران کئی بار مثالی ضابطہ اخلاق کی خلاف ورزی کی ہے اور الیکشن کمیشن محترمہ دیو کی شکایت پر توجہ نہیں دے رہا ہے۔'
درخواست میں کہا گیا ہے کہ مسٹر مودی نے تیسرے مرحلہ کی پولنگ کے دن 23 اپریل کو ایک روڈ شو کے دوران مثالی ضابطہ اخلاق کی خلاف ورزی کی تھی۔
