نئی دہلی: کانگریس کے صدر ملکارجن کھرگے نے ہفتہ کو اپنی ٹیم میں ایک بڑی تبدیلی کرتے ہوئے 12 جنرل سکریٹری اور 12 ریاستی انچارجوں کا تقرر کیا۔ پارٹی کے تنظیمی جنرل سکریٹری کے سی وینوگوپال کے ذریعہ جاری کردہ ریلیز میں یہ جانکاری دی گئی ہے۔ ان میں سب سے نمایاں نام پرینکا گاندھی واڈرا کا ہے، جنہیں جنرل سکریٹری کے عہدے پر برقرار رکھا گیا ہے لیکن فی الحال انہیں کسی ریاست کا چارج یا کوئی دوسری ذمہ داری نہیں دی گئی ہے۔ وہ پچھلے پانچ سالوں سے اتر پردیش کے انچارج کا کردار ادا کر رہی تھیں۔
پارٹی کے جنرل سکریٹری اویناش پانڈے کو پرینکا گاندھی کی جگہ اتر پردیش کا نیا انچارج مقرر کیا گیا ہے۔ وینوگوپال تنظیم کے جنرل سکریٹری رہیں گے اور جنرل سکریٹری جے رام رمیش بھی پارٹی کے کمیونیکیشن ڈیپارٹمنٹ کے انچارج رہیں گے۔ اجے ماکن پارٹی کے خزانچی کا کردار ادا کرتے رہیں گے۔ ان کے ساتھ دو لیڈر ملند دیورا اور وجے اندر سنگھالا کو مشترکہ خزانچی کی ذمہ داری دی گئی ہے۔
رندیپ سنگھ سرجے والا سے مدھیہ پردیش کا چارج واپس لے لیا گیا ہے اور اب وہ صرف کرناٹک کے انچارج رہیں گے۔ ان کی جگہ جتیندر سنگھ کو مدھیہ پردیش کے انچارج کی اضافی ذمہ داری سونپی گئی ہے۔ سنگھ پہلے ہی آسام کے انچارج کا کردار ادا کر رہے ہیں۔ راجستھان کے سابق نائب وزیر اعلیٰ سچن پائلٹ کو چھتیس گڑھ کا انچارج بنایا گیا ہے اور انہیں جنرل سکریٹری بنایا گیا ہے۔ جنرل سکریٹری کماری سیلجا کو چھتیس گڑھ سے ہٹا کر اتراکھنڈ کے انچارج کی ذمہ داری دی گئی ہے۔ سکھجندر سنگھ رندھاوا راجستھان کے انچارج رہیں گے۔
