ریاست ہریانہ میں کانگریس کی صدر کماری شیلجہ نے ایک نجی نیوز چینل کے اینکر ارنب گوسوامی کی جانب سے کانگریس کی صدر سونیا گاندھی پر کیے گئے قابل اعتراض تبصرہ کی مذمت کی اور کہا کہ یہ تبصرہ بالکل ناقابل برداشت ہے۔
کماری شیلجہ نے دیر شام جاری بیان میں اسے بھارتی جنتا پارٹی (بی جے پی) کی سازش قرار دیا اور الزام عائد کیا کہ بی جے پی اسپونسرڈ کچھ چینل اور ان کے صحافی، صحافتی اقدار بھول کر ایسے پروگرام چلا کر جھوٹ پھیلا رہے ہیں۔
انہوں نے یہ بھی الزام عائد کیا کہ صحافی کے بھیس میں یہ لوگ ذاتی مفاد کے لیے سماج میں زہر گھولنے کا کام کررہے ہیں۔
کانگریس کی رہنما نے کہا کہ وزیراعظم نریندر مودی کو جواب دینا چاہیے کہ کیا بھارتی تہذیب و ثقافت میں اس طرح سے خاتون کی بے حرمتی ہونے دیں گے؟
کماری شیلجہ نے کہا کہ جمہوریت میں بولنے کی آزادی کا مطلب یہ نہیں ہے کہ کسی کے خلاف اس طرح سے قابل اعتراض اور بھدے زبان کا استعمال کرکے سفید جھوٹ پھیلایا جائے گا۔
انہوں نے کہا کہ سپریم کورٹ کو اس پر از خود نوٹس لے کر کاروائی کرنی چاہیے۔
