ملک کی راجدھانی دہلی میں ڈینگو کا قہر رکنے کا نام نہیں لے رہا ہے۔ گزشتہ ہفتے دہلی میں ڈینگو کے کل 283 نئے کیس رپورٹ ہوئے، جس کے بعد دہلی میں ڈینگو معاملے کی تعداد ایک ہزار سے تجاوز کر گئی ہے۔وہیں اب اس پر سیاست بھی تیز ہوگئی ہے۔
عام آدمی پارٹی نے جہاں ڈینگو کو لے کر مرکزی حکومت بی جے پی کے خلاف مورچہ کھول دیا ہے، وہیں بی جے پی عام آدمی پارٹی حکومت پر تنقید کرتے ہوئے کہہ رہی ہے کہ ڈینگو کے معاملے میں دہلی حکومت بالکل سنجیدہ نظر نہیں آرہی ہے جس کی وجہ سے ڈینگو معاملات مین دن بدن اضافہ ہوتا جارہا ہے۔
آج دہلی میں بی جے پی کے ریاستی صدر اور تینوں میئرس نے مل کر ایک پریس کانفرنس کی، جس میں انہوں نے نہ صرف ڈینگو معاملے میں اضافے کے لیے دہلی حکومت کو ذمہ دار ٹھہرایا بلکہ یہ بھی کہا کہ میونسپل کارپوریشن کم وسائل ہونے کے باوجود ذمہ داری پوری کر رہی ہے۔ ایم سی ڈی مچھروں سے پیدا ہونے والی بیماریوں کو روکنے کے لیے ایک مہم کے حصے کے طور پر ادویات کا چھڑکاؤ کرے گا۔
بی جے پی نے الزام لگایا کہ اگر کوئی دہلی میں ڈینگو کے بڑھتے ہوئے کیسز کا ذمہ دار ہے تو وہ دہلی حکومت ہے۔ جس نے نہ تو اپنی ذمہ داری صحیح طریقے سے ادا کی اور نہ ہی کارپوریشنوں کو فنڈز جاری کئے ہیں ۔ دہلی حکومت اشتہارات کے ذریعے اپنا چہرہ چمکانے میں لگی ہوئی ہے۔
مزید پڑھیں: دہلی میں بڑھتے ڈینگو کے لیے ایم سی ڈی ذمہ دار: آتشی
ڈینگو کے کیسز میں گزشتہ سال کے مقابلے میں اضافہ ہوا ہے۔ اس سال ایک خاتون کی موت بھی ہوئی ہے۔ ہر ہفتے ڈینگو کے ریکارڈ کیس رپورٹ ہو رہے ہیں۔ تاہم حیران کن بات یہ ہے کہ نوڈل ایجنسی ایم سی ڈی اب تک ڈینگو کے 597 کیسز کا سراغ نہیں لگا سکی ہے۔ اکتوبر کے مہینے میں دہلی کے اندر ڈینگو کے 665 کیس رپورٹ ہوئے ہیں ، جبکہ پچھلے سال صرف 346 کیس رپورٹ ہوئے تھے۔ سال 2020 میں دہلی میں صرف 1072 کیس رپورٹ ہوئے، جبکہ اس سال ڈینگو کیسز کی تعداد 1006 تک جا پہنچی ہے، جو آنے والے دنوں میں مزید بڑھ سکتی ہے۔
آپ کو بتادیں کہ اب تک دہلی میں ڈینگو کے کل ایک ہزار چھ معاملے رپورٹ ہوئے ہیں جن میں سے حیران کن بات یہ ہے کہ اب تک 597 کیسز یعنی تقریبا 60 فیصد کیسز کا پتہ نہیں چل سکا ہے۔ اسی وقت ملیریا اور چکن گنیا کے کیس بھی دارالحکومت دہلی میں آہستہ آہستہ پھیل رہے ہیں۔ پچھلے ہفتے نئے کیسز کی آمد کے بعد دارالحکومت میں ملیریا کے کیسز کی تعداد 154 اور چکن گنیا کی تعداد 73 ہوگئی ہے۔ راجدھانی دہلی میں جس طرح ڈینگو کے کیسز بڑھ رہے ہیں، حالات تشویشناک ہیں۔
