نئی دہلی: یوں تو سال بھر ہی محبوب الہی حضرت نظام الدین اولیا کی درگاہ عقیدت مندوں سے بھری رہتی ہے لیکن رمضان المبارک کے دوران یہاں عقیدت اور روحانی کیف و سرور کے بے پایاں مناظر دیکھنے کو ملتے ہیں۔ عقیدت مند یہاں افطاری کرنا اپنے لیے باعث اجر و ثواب سمجھتے ہیں۔ نماز عصر ہوتے ہی درگاہ شریف میں ہر طرف دسترخوان بہت سلیقے اور قرینے سے لگ جاتے ہیں اور ان پر افطاری کے تمام لوازمات اور تبرک تقسیم کر دیے جاتے ہیں۔ Iftar at Hazrat Nizamuddin Dargah
گزشتہ دو برس کووڈ 19 کی نظر رہے تاہم رواں برس درگاہ شریف پر افطار کی بابرکت ساعتوں کا نزول اپنے عروج پر پہنچ چکا ہے۔درگاہ حضرت نظام الدین کی انتظامی کمیٹی کے جنرل سیکریٹری سید کاشف علی نظامی نے بتایا کہ ان دنوں رمضان المبارک کے آخری عشرے میں درگاہ حضرت محبوب الہی پر انوار و تجلیات کی بارش ہو رہی ہے اور حاجت مند یہاں سے مرادوں کی جھولیاں بھر بھر کر لے جا رہے ہیں۔محبوب الہی کی حیات مبارکہ میں جس طرح بندگان خدا کو کھانے کو روٹی ملتی اور ان کی حاجت روائی ہوتی اسی طرح آج بھی روزانہ ہزاروں افراد کو پیٹ بھر کر کھانا مل رہا ہے۔
