کرائم برانچ کے پولیس ڈپٹی کمشنر راجیش دیو نے بتایا کہ 'گرفتار شدہ لوگوں کے قبضے سے 311 موبائل فون برآمد کیے گئے ہیں جس کی قیمت 60 لاکھ روپے سے زیادہ ہے۔ گروہ کے سبھی افراد کو گرفتار کر لیا گیا ہے۔'
گرفتار شدہ لوگوں کی شناخت نریش کمار (30)، مکیش کمار (38)، نریش کمار (27)، راجن عرف اجیت (28) رام سنگھ (58)، گوپال پاٹھک (31) اور روہت عرف کاکے (23) کے طور پر ہوئی ہے۔
رام سنگھ نیپال کا رہنے والا ہے جبکہ باقی چھ دہلی کے رہنے والے ہیں۔
ان میں سے روہت جیب كترا جو گنجان آبادی والے علاقے میں موبائل چوری کرتا ہے جبکہ کچھ چوری یا لوٹے ہوئے موبائل خرید کر نیپال بھیجنے کا کام کرتے ہیں۔ ان لوگوں کے خلاف مختلف پولیس اسٹیشنوں میں کئی معاملے درج ہیں۔
گرفتار شدہ لوگوں میں سے ایک نے بتایا کہ 'گذشتہ دو تین برس سے وہ غفار مارکیٹ میں موبائل بنانے کا کام کرتا تھا۔ پولیس کی مسلسل چھاپہ ماری اور موبائل کی قیمتوں میں کمی کی وجہ سے اس کا کام متاثر ہو گیا جس کے بعد وہ چوری کے موبائل ملک سے باہر بھیجنے لگا۔
مذکورہ شخص نے بتایا کہ 'چوری کے موبائل کے آئی ایم آئی ڈی نمبر سے پکڑے جانے کا خطرہ رہتا تھا لہذا بیرون ملک میں موبائل فروخت کرنا ہی واحد متبادل رہ گیا تھا۔
نیپال جانے والی بس سروس نے موبائل بھیجنا آسان کر دیا اور اس سے اچھی رقم بھی ملنے لگی۔
پولیس ڈپٹی کمشنر نے کہا کہ 'ضبط شدہ موبائل کا آئی ایم ای آئی نمبر اور معلومات کو جلد ہی دہلی پولیس کی ویب سائٹ پر اپ لوڈ کیا جائے گا تاکہ لوگ اپنے موبائل کی شناخت کرکے قانونی عمل کے ذریعے اسے حاصل کر سکیں۔'
