قومی دارالحکومت دہلی میں گذشتہ دنوں ہوئے فرقہ وارانہ فسادات میں سیکڑوں آشیانے جل کر خاک ہو گئے تھے۔ باقی رہی سہی کسر کورونا دور میں لاک ڈاؤن نے پوری کر دی تھی۔ ایسے میں فساد زدگان کی مدد کے لیے جمعیت علماء ہند نے آگے بڑھ کر ان کی ضرورتوں کو پورا کیا۔
شمال مشرقی دہلی کے فساد زدہ علاقہ کراول نگر کے گدھا پوری چوک میں جمعیت علماء ہند کے ذریعہ فساد متاثرین کے لیے تعمیر شدہ مکانات کا افتتاح کیا گیا۔
اس دوران گھروں سے چھوٹی چھوٹی بچیاں باہر نکل کر آئیں اور انہوں نے ایک آواز میں جمعیت علماء ہند کا شکریہ ادا کیا۔
یہ بھی پڑھیں: مہنگائی اور مندی سے نالاں راہل، پرینکا کی حکومت پر تنقید
متاثرین نے ای ٹی وی بھارت سے بات چیت کرتے ہوئے بتایا کہ دہلی حکومت کی جانب سے مکمل طور پر مدد نہیں مل پائی لیکن جمعیت علماء ہند نے اس وقت مدد کی جب وہ بہت زیادہ مصیبت میں تھے۔
جمعیت علماء ہند نے دہلی فسادات میں جلنے والے 156 مکانات تعمیر کرائے ہیں جبکہ کچھ روز قبل ہی جمعیت نے گوکل پوری کی ٹائر مارکیٹ کی دکانوں کا بھی افتتاح کیا تھا۔
اس کے علاوہ دہلی میں جمعیت علماء ہند کے زیر اہتمام 10 مساجد اور 139 دکانیں تعمیر کرائی جا رہی ہیں۔
