دہلی اسمبلی انتخابات سے قبل مرکزی وزیر شہری ترقیات ہردیپ سنگھ پوری نے گرین پارک میں ملٹی لیول کار پارکنگ کا افتتاح کیا گیا تھا۔
گرین پارک کے گنجان آبادی والے علاقے میں بغیر سیفٹی آڈٹ کے یہ 17 منزلہ پارکنگ تعمیر کرائی گئی تھی جو گذشتہ دنوں منہدم ہوگئی جس کے بعد سیاست تیز ہوگئی ہے۔
عام آدمی پارٹی نے پریس کانفرنس کرکے بی جے پی پر بدعنوانی کا الزام لگاتے ہوئے اس کی جانچ کرانے کا مطالبہ کیا ہے۔
عام آدمی پارٹی نے مطالبہ کیا ہے کہ ایک سال میں ڈھہ جانے والی پارکنگ کا آڈٹ کرایا جائے۔ اسی کے ساتھ سپریم کورٹ کے ذریعہ ایس آئی ٹی تشکیل دے کر آزاد ادارے سے اس گھپلے کی جانچ کرائی جائے۔
پارٹی ہیڈ کوارٹر میں منعقد پریس کانفرنس میں چیف ترجمان سوربھ بھاردواج، رکن اسمبلی آتشی اور سوم ناتھ بھارتی کے ساتھ جنوبی دہلی میونسپل کارپوریشن میں اپوزیشن لیڈر پریم چوہان نے کہا کہ ایم سی ڈی کی پارکنگ ایک سال کے اندر گرگئی۔ یہ بی جے پی کی بدعنوانی کا ثبوت ہے۔ دہلی کو ایم سی ڈی اور بی جے پی نے شرمسار کیا ہے۔
انہوں نے کہا کہ پارکنگ کی تعمیر کی ذمہ داری کس ٹھیکیدار کو کس افسر کے ذریعہ دی گئی، اس کا بی جے پی لیڈروں سے کیا روابط ہیں، اس کی جانچ ہونا ضروری ہے۔
یہ بھی پڑھیں: نماز کیلئے مختص زمین پر ہندو تنظیموں نے پوجا کی، مسلمانوں میں ناراضگی
انہوں نے کہا کہ بی جے پی نے بدعنوانی میں پی ایچ ڈی حاصل کر رکھی ہے۔ اس کی انوکھی مثال یہ ہے کہ ایک سال کے اندر 19 کروڑ روپے میں تعمیر پارکنگ منہدم ہوگئی۔
انہوں نے کہا کہ دہلی بی جے پی کے ریاستی صدر آدیش گپتا کو بتانا چاہیے کہ کیا اس پارکنگ گھوٹالے میں بی جے پی ملوث تھی؟
