بھارت کے روحانی تاجدار سلطان مشائخ خواجہ سیّد محمد نظام الدین اولیاء کا 717 واں سالانہ پانچ روزہ عرس مبارک بڑی عقیدت و احترام کے ساتھ منایا جا رہا ہے۔
کووڈ 19 سے تحفظ کے لیے انتظامیہ کی طرف سے بنائی گئی گائیڈ لائن کا پوری طرح سے عمل کرتے ہوئے 3 سے 7 دسمبر تک چلنے والے محبوب الٰہی کے عرس کے موقع پر درگاہ کے خدام کی جانب سے پوری درگاہ کو قمقموں اور خصوصی پنڈال لگاکر سجایا گیا ہے اور محافل و لنگر کا خصوصی اہتمام کیا گیا ہے۔
پانچ روزہ عرس کے پہلے روز بعد نماز عصر تلاوت کلام پاک اور فاتحہ خوانی سے عرس کی تقریب کا آغاز ہوا اور بعد نماز مغرب نعت و منقبت نیز شجرہ کی خصوصی نشست اور عشاء کی نماز کے بعد مختصر وقت کے لیے محفل سماع کا انعقاد کیا گیا۔
درگاہ کے چیف انچارج سید محمد کاشف علی نظامی نے بتایا کہ خواجہ حضرت نظام الدین کی درگاہ میں زائرین کے لیے احتیاطی تدابیر کی گئی ہیں، جگہ جگہ ماسک سینیٹائزر اور سماجی فاصلے کو ترجیح دی جارہی ہے، ساتھ ہی لنگر شریف پیکٹ کے ذریعے تقسیم کیا جا رہا ہے۔
اس کے علاوہ زائرین کو زیادہ دیر رکنے کی اجازت نہیں ہے، آستانہ شریف پر پھول چادر وغیرہ پیش کرنے کی اجازت نہیں ہے کیونکہ آستانہ کو پوری طرح سے پلاسٹک سے ڈھانپا گیا ہے۔
