دہلی میں سی اے اے مخالف 66 احتجاج، 11 مقدمات درج

وزارت داخلہ نے لوک سبھا میں ایک تحریری جواب میں قومی دارالحکومت دہلی میں سی اے اے مخالف مظاہرے کے بارے میں بتایا ہے۔

وزارت داخلہ کی رپورٹ میں کہا گیا ہے کہ دہلی میں شہریت ترمیمی قانون کے خلاف 66 مظاہرے ہوئے اور لگ بھگ 11 مقدمات درج کیے گئے جن میں 99 افراد کو گرفتار کیا گیا۔

منگل کو وزارت داخلہ امور (ایم ایچ اے) نے لوک سبھا میں ایک تحریری جواب میں کہا ہے کہ دہلی میں شہریت ترمیمی قانون (سی اے اے) کے خلاف 66 مظاہرے ہوئے۔

اس میں مزید کہا گیا کہ 'دہلی پولیس نے شہریت (ترمیمی) ایکٹ 2019 کے خلاف احتجاج کے دوران تشدد، غیر قانونی اجتماعات، پتھراؤ، عوامی / ذاتی املاک کو نقصان اور گرفتار افراد کی تعداد کے واقعات کی اطلاع دی ہے'۔

واضح رہے کہ سی اے اے کے ذریعے 31 دسمبر 2014 کو یا اس سے قبل بھارت میں پاکستان، افغانستان اور بنگلہ دیش سے مذہبی ظلم و ستم سے فرار ہونے والے ہندوؤں، سکھوں، جینوں، پارسیوں، بودھوں اور عیسائیوں کو شہریت دی جائے گی۔