ریاست چھتیس گڑھ کے ضلع دنتے واڑہ میں پولیس نے ایک مشترکہ کارروائی میں نو ماؤنواز کو گرفتار کرنے میں کامیابی حاصل کی ہے۔
پولیس افسر ابھیشیک پلو نے بتایا کہ ضلع میں چلائی جا رہی انسداد ماؤنواز مہم کے تحت گذشتہ روز تھانہ کوآکونڈہ علاقے میں ماؤنوازوں کے موجود ہونے کی اطلاع موصول ہونے کے بعد ضلع ریزرو پولیس فورس اور تھانہ کوآکونڈہ کی مشترکہ پولیس پارٹی گشت پر نکلی تھی۔
موضع مولاواڑہ۔موکھپال کے درمیان جنگل میں کچھ افراد مشتبہ حالت میں موجود تھے جو پولیس ٹیم کو دیکھ کر وہاں سے بھاگنے لگے۔ بعد ازاں پولیس، محاصرہ کرکے نو ماؤنوازوں کو گرفتار کرنے میں کامیاب ہوئی۔ ان کے پاس سے بینر، پوسٹر، پٹاخہ برآمد کیا گیا ہے۔
گرفتار ماؤنواز پہلے بھی مختلف مقامات پر بینر، پوسٹر لگانا، ماؤنواز آئیڈیالوجی کی نشر و اشاعت کرنا، فورس کے آنے کے بعد پٹاخہ پھوڑ کر ماؤنوازوں کو مطلع کرنے کا کام کرتے تھے۔
