مہاسومند: سڑک حادثے میں بارہ افراد زخمی

ریاست چھتیس گڑھ کے مہاسومند ضلع میں مزدوروں سے بھری ہوئی ایک بس اس وقت سڑک حادثے کا شکار ہوگئی جب وہ مہاراشٹر سے مغربی بنگال کی جانب جا رہی تھی۔

یہ بس ریاست مہاراشڑ کے دارالحکومت ممبئی سے چلی تھی اور اسے مغربی بنگال کے میتری پور پہنچنا تھا ، لیکن راستے میں حادثے کا شکار ہوگئی۔

یہ حادثہ قومی شاہراہ نمبر53 پر کھیری اور چھچین نامی گاؤں کے درمیان پیش آیا۔

اس بس میں 26 افراد سوار تھے، جن میں 12 افراد زخمی ہوگئے ہیں۔

زخمیوں کو قریبی ہسپتال میں داخل کرایا گیا اور ابتدائی طبی معائنہ کے بعد مہاسومند ڈسٹرکٹ ہسپتال میں منتقل کر دیا گیا۔

سبھی مزدوروں کا تعلق مغربی بنگال کے میتری پور سے ہے۔

حکام کے مطابق شدید زخمیوں کا علاج جاری ہے جبکہ بقیہ مسافروں کو ابتدائی طبی امداد کے بعد مہاسومند انتظامیہ نے میتری پور کے لیے روانہ کر دیا ہے۔

پولیس اہلکار کے مطابق ڈرائیور کو نیند کی جھپکی آنے کی وجہ سے یہ حادثہ ہوا۔

یہ حادثہ اس وقت پیش آیا جب کہ مزدوروں کے سڑک حادثے میں زخمی اور ہلاک ہونے کی خبریں مسلسل گردش کر رہی ہیں۔