پارلیمنٹری اسٹینڈنگ کمیٹی برائے رورل ڈیولپمنٹ نے وادیٔ کشمیر کا دورہ کیا، دورے کے دوران انہوں نے ضلع بڈگام کے کئی مقامات پر ترقیاتی کاموں کا جائزہ لینے کے علاوہ کئی وفود سے ملاقات کی۔
انہوں نے کئی پنچایتوں میں جاکر ترقیاتی کام کاج کا جائزہ لیا۔ اس کے علاوہ انہوں نے سی ایس ای سینٹرس (خدمت سینٹرس) کا بھی معائنہ کیا۔ اس دوران انہوں نے مرکز کی جانب سے دیہی علاقوں کو ملنے والی اسکیموں کے تحت فنڈنگ کے استعمال کے طریقہ کار سے متعلق بھی معلومات حاصل کی۔
کمیٹی کے چیئرمین ولاس راؤ پرساد نے میڈیا سے بات کرتے ہوئے کہا کہ دورے کا مقصد مرکزی سرکار کی جانب سے دیہی علاقوں کے لئے جاری کردہ اسکیموں اور فنڈس سے متعلق قانونی و دیگر مشکلات کا جائزہ لیکر انہیں مرکزی سرکار تک پہنچانا ہے تاکہ مرکزی معاونت والی اسکیموں کو زمینی سطح پر مقررہ وقت پر لاگو کیا جاسکے۔
انہوں نے کہا کہ دورے کے دوران کمیٹی ترقیاتی منصوبوں کا جائزہ لینے کے علاوہ عوامی وفود و سرکاری عہدیداران سے ملاقات کرکے ایک مفصل رپورٹ پارلیمنٹ میں پیش کرے گی تاکہ ترقیاتی منصوبوں میں حائل رکاوٹیں آئندہ منصوبوں میں دور کی جاسکیں۔
ولاس راؤ نے کہا کہ مرکزی سرکار دیہی علاقوں میں ترقی اور خوشحالی کے ساتھ ساتھ عوام کو سہولیات پہنچانے کے لئے وعدہ بند ہے۔
مزید پڑھیں؛ یومِ شہداء کے موقع پر سرینگر میں تحدیدات
انہوں نے مزید کہا کہ مرکزی سرکار کی جانب سے وضع کی گئی اسکیموں اور فنڈس کو مقررہ وقت تک خرچ کیے جانے کو یقینی بنانے کے لیے ہی پارلیمنٹری اسٹینڈنگ کمیٹی ملک کے طول و عرض میں جاکر معائنہ کرکے مفصل رپورٹ مرکزی سرکار کو پیش کرے گی۔
ولاس راؤ نے کہا کہ انہوں نے ضلع بڈگام میں عوامی نمائندوں سے ملاقات کرکے کئی ترقیاتی منصوبوں کا جائزہ لیا۔ وہیں کمیٹی مختلف محکمہ جات کے افسران سے بھی ملاقات کرے گی۔
