بڈگام: وائلڈ لائف کی ٹیم نے تیندوے کو پکڑ لیا

جہاں گزشتہ شب عقیدت مند شب برات کی محفل میں ذکر و اذکار اور دعائوں میں مشغول تھے وہیں محکمہ وائلڈ لائف کے اہلکار بڈگام کے چاڈورہ علاقے میں ایک تیندوے کو پکڑنے میں مصروف تھے۔

وسطی کشمیر کے ضلع بڈگام کے چاڈورہ علاقے میں تیندوے کی موجودگی کی خبر موصول ہوتے ہی محکمہ وائلڈ لائف کی ٹیم تیندوے کو پکڑنے کے لیے چاڈورہ پہنچی۔

وائلڈ لائف چاڈورہ کے بلاک آفیسر بشیر بٹ نے بتایا کہ گزشتہ روز دوپہر کو انہیں چاڈورہ کے تنگنار، حیات پورہ علاقے میں ایک تیندوے کی موجودگی کی اطلاع موصول ہوئی۔ انہوں نے کہا کہ موقع پر پہنچنے کے بعد ٹیم نے تیندوے کو ایک اونچے درخت پر پایا۔

بلاک آفیسر نے کہا کہ ’’کافی مشقت کے بعد رات کے قریب 2:30 بجے ہم تیندے کو صحیح سالم پکڑنے میں کامیاب ہو گئے۔‘‘

انہوں نے کہا کہ کسی بھی جنگلی جانور کی انسانی بستی میں موجودگی کی اطلاع کے بعد وائلڈ لائف کی ٹیم لوگوں، عملہ اور جنگلی جانور کی حفاظت کو اولین ترجیح دیتی ہے۔

اس ضمن میں مزید تفصیلات فراہم کرتے ہوئے انہوں نے کہا کہ وائلڈ لائف کی ٹیم نے دسمبر سے اب تک وادی میں کل 8تیندے پکڑے ہیں۔