بڈگام: وسطی کشمیر کے ضلع بڈگام میں ڈپٹی کمشنر، اکشے لبرو، نے بیروہ میں شری ابھینو گپت کے بیرم غار سائٹ کا دورہ کیا اور وہاں جاری ترقیاتی کاموں کا معائنہ کیا۔ دورے کے دوران ڈی سی نے وہاں جاری پروجیکٹس پر کام کی پیش رفت کا جائزہ لیا، جن میں - غار تک رسائی، غار تک سیڑھیاں، رابطہ سڑک کی ڈیولپمنٹ، کنکریٹ پارک پر ٹائل کا کام، پارک کی لان ڈیولپمنٹ اور بیوٹیفیکیشن، بینچوں کی تنصیب، گھاس کی کٹائی، شامل ہیں۔ غار تک جانے والے راستے پر اسٹریٹ لائٹس اور اسٹریم سائڈ کے قریب پارک کی اپگریڈیشن پر جاری کام کا بھی جائزہ لیا گیا۔
ڈی سی نے اس بات پر زور دیا کہ ’’تمام منصوبوں پر کام کا عمل تیز کیا جائے اور تمام ترقیاتی منصوبے کم سے کم وقت میں مکمل کیے جائیں۔‘‘ انہوں نے کہا کہ ’’بیرم غار کے مقام پر سیاحت کی صلاحیت موجود ہے اور اسے ہیریٹیج کے ساتھ ساتھ مذہبی سیاحت کے لیے بھی تیار کیا جائے گا۔‘‘ ڈی سی کے مطابق ضلع انتظامیہ بیرم غار کی ترقی کو یقینی بنانے اور اس کے ورثے کے ساتھ ساتھ (بیرم) یاترا کی اہمیت کے پیش نظر سیاحوں کی بغیر کسی پریشانی کے اس مقام پر پہنچنے کے لیے تمام سہولیات فراہم کرنے کے لیے پرعزم ہے۔
مزید پڑھیں: ڈی سی بڈگام نے بیرم غار سائٹ بیروہ کا دورہ کیا
دورے کے دوران ڈی سی نے کہا کہ ’’جب سیاح اس مقام کا دورہ / یاترا شروع کریں گے تو بیروہ علاقے کے مقامی لوگوں کو اس کا زیادہ فائدہ حاصل ہوگا۔‘‘ انہوں نے کہا کہ ’’تمام برادریوں کے لوگ معاون ہیں اور بڈگام میں ترقیاتی عمل میں بہت زیادہ تعاون کرتے ہیں۔‘‘ ڈی سی کے ہمراہ اے ڈی ڈی سی، ڈاکٹر اکرم اللہ ٹاک، جے ڈی پلاننگ ایس ڈی ایم بیروہ، اے سی ڈی، سی ایم او، مختلف انجینئرنگ ونگز کے ایگزیکٹو انجینئرز، تحصیلدار، بی ڈی او اور دیگر متعلقہ افسران موجود تھے۔ وہیں اس موقع پر بڈگام ضلع کے معروف اسکالر مولوی لطیف احمد، صدر میونسپل کونسل بیروہ اور دیگر معززین نے بھی دورے کے دوران ڈی سی کے ساتھ ملاقات کی۔
