بڈگام: جموں و کشمیر پولیس نے معاشرے سے منشیات کی بدعت کو ختم کرنے کی اپنی کوششوں کو جاری رکھتے ہوئے وسطی کشمیر کے ضلع بڈگام میں دو منشیات فروشوں کو گرفتار کیا ہے۔ بڈگام پولیس نے حراست میں لیے گئے منشیات فروشوں کی تحویل سے سائیکو ٹراپک مادہ (منشیات) برآمد کرنے کا دعویٰ کیا ہے۔ بڈگام پولیس کے مطابق ضلع کے دریگام علاقے میں ناکہ چیکنگ کے دوران پولیس اسٹیشن خانصاحب کی ٹیم نے ایک نجی کار (ماروتی) زیر رجسٹریشن نمبر JK01F-6877 کو روک کر ڈرائیور سے پوچھ تاچھ کی۔
پولیس بیان کے مطابق ابتدائی پوچھ تاچھ کے دوران ڈرائیور نے اپنی شناخت شبیر احمد چوپان (المعروف شبیر دیمبالی) ولد غلام احمد چوپان ساکنہ دیمبل، چاڈورہ کے طور پر ظاہر کی جبکہ گاڑی میں ایک اور شخص ارشاد احمد راتھر ولد محمد ایوب راتھر ساکنہ ڈاڈ اومپورہ، چاڈورہ بھی سوار تھا۔ بڈگام پولیس کے مطابق تلاشی کے دوران 490-گرام چرس برآمد ہوا۔ پولیس نے ملزمان کو موقع پر ہی گرفتار کر لیا ساتھ ہی جرم میں استعمال ہونے والی گاڑی کو بھی پولیس نے قبضے میں لے لیا ہے۔ اس ضمن میں ایک مقدمہ ایف آئی آر نمبر 95/2023 قانون کی متعلقہ دفعات کے تحت پولیس اسٹیشن خانصاحب میں درج کیا گیا ہے اور مزید تحقیقات شروع کر دی گئی ہے۔
مزید پڑھیں: Budgam Man Attacked by In laws: بڈگام میں سسرال والوں نے داماد کو پیٹا
واضح رہے کہ بڈگام پولیس نے رواں برس اب تک 77 منشیات فروشوں کو گرفتار کرکے انہیں سلاخوں کے پیچھے دھکیل دیا ہے۔ ان ملزمین کی تحویل سے بھاری مقدار میں منشیات کو بھی ضبط کر لیا گیا ہے۔ منشیات فروشوں کے خلاف کارروائی کے دوران رواں برس بڈگام سمیت وادی کشمیر کے دیگر اضلاع میں بھی کئی منشیات فروشوں، عادی مجرموں کو پبلک سیفٹی ایکٹ کے تحت جیل بھیج دیا گیا ہے۔
