وسطی کشمیر کے ضلع بڈگام میں آئندہ کل سے عالمی وبا کورونا وائرس سے لوگوں کو محفوظ رکھنے کے لئے ٹیکہ کاری کا عمل شروع کیا جا رہا ہے۔
ضلع بڈگام میں پہلے مرحلے میں ہفتہ کو دو سو ہیلتھ ورکروں کو ٹیکہ لگایا جائے گا اور اس سلسلے میں تمام تر تیاریاں مکمل کر لی گئی ہیں۔
ضلع اسپتال بڈگام میں اس سلسلے میں ایک خصوصی اور علیحدہ وارڈ کا قیام بھی عمل میں لایا گیا ہے، جہاں پر ہیلتھ ورکروں کو ٹیکہ لگایا جائے گا۔
سی ایم او بڈگام نے ای ٹی وی بھارت کے ساتھ بات کرتے ہوئے کہا کہ خصوصی وارڈ کو پوری طرح سے سینیٹائز کیا گیا ہے، سماجی دوری کے ساتھ ساتھ صفائی کا بھی دھیان رکھا گیا ہے۔
اس ضمن میں اسپتال کے میڈیکل سپر انٹنڈنٹ نے وارڈ میں فراہم کی جا رہی سہولیات کا بھی جائزہ لیا۔
سی ایم او بڈگام ڈاکٹر تجمل حسین نے کورونا ٹیکہ کاری کے حوالے سے تفصیلات فراہم کرتے ہوئے کہا کہ ’’کل (ہفتہ کو) ضلع اسپتال، بڈگام اور ایس ڈی ایچ ماگام میں پہلے مرحلے کے تحت دو سو ہیلتھ ورکروں کی ٹیکہ کاری کا عمل شروع کیا جائے گا۔‘‘
واضح رہے کہ عالمی وبا کورونا وائرس کے سبب ضلع بڈگام میں اب تک 7,694 افراد اس مہلک بیماری کا شکار ہوئے ہیں جن میں سات ہزار پانچ سو ستائیس صحت یاب ہوئے ہیں۔ وہیں کورونا وائرس کی وجہ سے ضلع میں ایک سو تیرہ افراد فوت ہو چکے ہیں۔
