بڈگام: ماسک نہ پہننے والوں کے خلاف سخت ایڈوائزری جاری

وسطی کشمیر کے ضلع بڈگام میں گزشتہ چند روز سے کورونا وائرس کے مثبت معاملوں میں اضافے کے بعد اب انتظامیہ محتاط ہو گیا ہے۔ انتظامیہ نے ضلع میں ماسک نہ پہننے والوں کے خلاف سخت ایڈوائزری جاری کی ہے۔

انتظامیہ نے ہدایت جاری کرتے ہوئے کہا کہ جو بھی شخص اپنے گھر سے باہر نکلے گا، اس کے لئے ماسک پہننا ضروری ہے تاکہ کورونا وائرس سے لوگوں کو محفوظ رکھنے میں مدد فراہم ہو سکے۔

انتظامیہ نے آرڈر میں یہ بھی لکھا ہے کہ جو بھی شخص اس کی خلاف ورزی کرے گا، اس کے خلاف پانچ سو روپے جرمانہ عائد کیا جائے گا۔

ہدایت میں یہ بھی لکھا گیا ہے کہ جو شخص بار بار غلطی کو دہرائے گا، اس کے خلاف ایک ہزار روپے کا جرمانہ عائد کیا جائے گا۔

ڈسٹرکٹ ڈیزاسٹر مینجمنٹ اتھارٹی نے متعلقہ ایس ڈی ایم اور تحصیلدار کو ہدایت دی ہے کہ اس پر عمل کر کے فیلڈ میں اسٹاف کو تعینات کیا جائے اور روزانہ کی رپورٹ ایڈیشنل ڈی سی کو پیش کی جائے۔

آرڈر میں میونسپل کونسل اور پولیس اسٹیشنوں کو بھی ہدایت دی گئی ہے کہ وہ اپنے علاقے میں ان احکامات کو نافذ کریں تاکہ لوگوں کو کورونا وائرس سے محفوط رکھا جا سکے۔

واضح رہے کہ ملک میں کورونا وائرس کے مثبت معاملوں میں اضافے کے بعد منسٹری آف ہیلتھ اینڈ فیملی ویلفیئر گورنمنٹ آف انڈیا نے لوگوں کو کورونا وائرس کی ایس او پیز پر عمل کرنے کا مشورہ دیا ہے جس پر محکمہ ڈیزاسٹر اینڈ مینجمنٹ نے کارروائی شروع کر دی ہے۔