رمضان المبارک دراصل گناہوں کو مٹانے اور نیکیوں میں اضافہ کرنے کا مہینہ ہے، اس مہینے کی خاص بات یہ ہے کہ رمضان میں روزے سے لوگوں میں تقویٰ پیدا ہوتا ہے، روزہ کا اصل مقصد ہی تقویٰ اختیار کرنا ہے تاکہ لوگ متقی اور پرہیز گار بن جائیں.
قرآن کریم میں بھی اللہ تعالیٰ فرماتا ہے کہ اے لوگو، ہم نے تم پر رمضان کے روزے فرض کیے تاکہ تم تقویٰ اختیار کرو. اللہ پاک کے پاس محبوب بننے کا اور قریب ہونے کا واحد ذریعہ تقویٰ ہی ہے.
مذکورہ باتیں الغزالی انٹرنیشنل اسکول کے ڈائریکٹر اور نوجوان عالم دین و صاحب قلم مولانا مدثر احمد قاسمی نے رمضان اور تقویٰ کے تعلق سے ای ٹی وی بھارت سے خصوصی گفتگو کے دوران کی۔
مولانا مدثر قاسمی نے کہا 'آج انسان تمام طرح کی عبادات تو کر رہا ہے مگر اس میں خشوع و خضوع کی حد درجہ کمی ہے، ایک طرف وہ عبادات میں بھی مشغول ہے تو دوسری طرف تمام برے کام بھی انجام دے رہا ہے، اس سے پتہ چلا کہ وہ عبادت محض دکھاوے کے لیے کر رہا ہے، اس میں تقویٰ نہیں آیا ہے'.
یہ بھی پڑھیے
جموں و کشمیر کے تمام اضلاع میں نائٹ کرفیو کا اعلان
مولانا مدثر قاسمی نے کہا 'رمضان دراصل ٹریننگ کا مہینہ ہے، اس ماہ میں ہم جو بھی اچھے اعمال اور عبادت کرتے ہیں۔ اس کا مقصد اسی طرح سال کے بقیہ مہینوں میں بھی کرنا ہے. اس مہینے میں جو بھی اللہ سے خاص لو لگا کر اپنے اندر تبدیلی لانا چاہتا ہے اس میں یقیناً تبدیلی آتی ہے. روزہ کی فرضیت اور اس کے قبولیت کا دارومدار تقویٰ پر ہی ہے'۔
