یہ احتجاجی جلوس کمیونٹی ہال قطب گنج ہاٹ نزد لائن اردو مڈل اسکول سے نکلا جو چوڑی پٹی ،سوداگر پٹی، گاندھی چوک،ڈے مارکیٹ کے راستہ بس اسٹینڈ سے گذر کر نیشنل ہائی وے ہوتے ہوئے ڈی ایم آفس پہنچا ۔ یہاں پہونچ کر ڈی ایم کشن گنج ہمانشو شرما کے حوالہ سے صدر جمہوریہ کو ماب لینچنگ کے خلاف میمورنڈم پیش کیا گیا۔
جلوس میں شریک لوگوں کے پاس احتجاجی تختیاں تھیں ۔ اس موقع پر صحافیوں سے بات کرتے ہوئے مجلس اتحاد المسلمین کے صوبائی صدر اختر الایمان نے کہا کہ ملک میں اقلیتوں کے ساتھ ظلم و زیادتی کے واردات بار بار دہرائے جارہے ہیں، جس کی بدترین شکل ہجومی تشدد ہے، اخلاق، پہلو خان،جنید ،قاسم،افروزالسلام کے ساتھ جو سفاکانہ و وحشیانہ سلوک ہوا اس کو انصاف تو ملا نہیں بلکہ ماب لینچنگ میں اضافہ ہی ہوا ہے۔
اسی سلسلہ کی ایک کڑی تبریز انصاری ہے۔ جس کو چوری کے بے بنیاد الزام میں بے دردی سے پیٹ کر ہلاک کردیا گیا۔
ملک میں اب تک ڈھائی سو سے زائد لوگ ماب لینچنگ کے شکار ہو چکے ہیں ۔سینکڑوں بچے یتیم اور مائیں بیوہ ہو چکی ہیں ۔آخر یہ سلسلہ کب تک چلے گا؟ یہ معاملہ ہمارے یا آپ کے ساتھ بھی ہوسکتا ہے۔
اختر الایمان نے ریاست کے نتیش سرکار پر بھی نکتہ چینی کی۔
وہیں توحید ایجوکیشنل ٹرسٹ کے چیئرمین مولانا مطیع الرحمن عبدالمتین نے ملک میں امن شانتی اور آپسی بھائی چارہ قائم رکھنے پر زور دیا۔ ساتھ ہی انہوں نے تبریز انصاری کی بیواہ کو 50 لاکھ کی مالی مدد اور سرکاری نوکری کا مطالبہ کیا۔
اس موقع پر سابق چئیرمین قمرالہدا اور سماجی کارکن مظہر الحسن نے اپنے خیالات کا اظہار کیا ۔
غور طلب ہے کہ آج صبح سے کشن گنج میں بارش جاری ہے اس کے باوجود ہزاروں کی تعداد میں لوگ اس احتجاج میں شریک ہوئے۔
