ریاست بہار کے ضلع ارریہ میں آج سے بڑے پیمانے پر پلس پولیو مہم کا آغاز ہو گیا، شہر کے وارڈ نمبر 10 کے آنگن باڑی کے سینٹر نمبر 324 پر منعقد ایک پروگرام کے تحت ضلع کلکٹر پرشانت کمار نے بچوں کو پولیو خوراک پلا کر پولیو مہم کی شروعات کی۔
اس موقع پر ضلع ہسپتال کے سول سرجن ڈاکٹر روپ نارائن کمار، ڈی آئی او ڈاکٹر معیز احمد، ضلع پروگرام آفیسر ڈاکٹر ریحان اشرف سمیت محکمہ صحت کے دیگر افسران، کارکنان و ملازمین موجود تھے۔
مہم کا آغاز کرتے ہوئے ضلع کلکٹر پرشانت کمار نے کہا کہ پولیو کی خوراک بچوں کو جان لیوا بیماریوں سے محفوظ رکھتی ہے، والدین کو چاہیے کہ ہر حال میں پولیو کی خوراک اپنے پانچ سال سے کم عمر کے بچوں کو ضرور پلائیں، کسی بہکاوے میں نہ آئیں بلکہ اپنے بچوں کا مستقبل دیکھیں۔
انہوں نے مزید کہا کہ پولیو خوراک مہم کے ساتھ ساتھ کورونا سے بچاؤ کے طریقے کار پر بھی سختی سے عمل کرنا ہے، چونکہ اس کے ساتھ ہی کورونا کا ٹیکہ بھی لوگوں کو دیا جا رہا ہے۔
ڈی ای او ڈاکٹر معیز احمد نے بتایا کہ پولیو مہم کے تحت پانچ سال سے کم عمر کے 7 لاکھ 29 ہزار 211 بچوں کو دوا پلانے کا ہدف ہے، دوا پلانے کے لئے 1659 ٹیم بھی بنائی گئی ہے، ان میں گھر جا جا کر دوا پلانے کے لئے 1401 ٹیم بنائی گئی ہے جبکہ 213 ٹراجنٹ ٹیم، 35 موبائل ٹیم اور 10 ٹیم کی بھی تشکیل ہوئی ہے۔
سول سرجن ڈاکٹر روپ نارائن کمار نے کہا کہ پولیو سے بچوں کو لکوا مارنے کا خطرہ زیادہ رہتا ہے، کم عمر کے بچے آسانی سے اس کے شکار ہوتے ہیں، اس بیماری سے بچاؤ کے لیے بچوں کو پولیو کی دو بوند پلانے کی نہایت ضرورت ہے۔
