ریاست بہار کے ضلع کشن گنج کی پولیس نے رکن اسمبلی کو دھمکی دینے کے معاملے میں ایک شخص کو گرفتار کر گھنٹوں پوچھ گچھ کی۔ پوچھ گچھ کے دوران ملزم نے اپنا گناہ قبول کیا اور کئی اہم جانکاریاں دیں جبکہ دیگر ملزمان کی تلاش جاری ہے۔
وہیں رکن اسمبلی ماسٹر مجاہد عالم نے ملزم کی گرفتاری کی خبر ملتے ہی کشن گنج ٹاؤن تھانہ پہنچ کر معاملے کی پوری جانکاری لی اور پولیس کو بتایا کہ اب تک کی کارروائی اطمینان بخش ہے اور انہوں نے کہا کہ 'مجھے پولیس کے ذریعہ ہونے والی کاروائی پر پورا اعتماد ہے۔ قانون اپنا کام کر رہا ہے اور جلد ہی تمام ملزمان پولیس کسٹڈی میں ہوں گے'۔
رکن اسمبلی مجاہد عالم کے مطابق اس معاملے میں شامل ملزمین میں سے 2 بہادرگنج تھانہ، 1 کوڈو باڑی تھانہ، 1ٹیڑا گاچھ، 1 روٹہ اور 1 کوچادھامن تھانہ سے تعلق رکھتے ہیں۔ انہوں نے مزید بتایا کہ موبائل لوکیشن کے ذریعے سبھی کا ایڈریس پتہ چل چکا ہے۔ بہت جلد سبھی سلاخوں کے پیچھے ہوں گے۔
واضح رہے کہ ایک واٹس گروپ بناکر رکن اسمبلی ماسٹر مجاہد اور ان کے اہل خانہ کو جان سے مارنے کی پلاننگ کی جارہی تھی، لیکن کسی طرح اس کی جانکاری مجاہد عالم کو لگ گئی۔ انہوں نے کشن گنج تھانہ پولیس کی مدد سے ملزمان کو گرفتار کرنے کی ترکیب تلاش لی۔ بتایا جا رہا ہے گزشتہ رات نیپال بارڈر سے صدام نامی ایک ملزم کو گرفتار کیا گیا ہے جبکہ دوسرے ملزمان کی تلاش کی جارہی ہے۔
