بہار حکومت کے فیصلہ کے مطابق جن طلباء نے این آئی او ایس سے ڈی ایل ایڈ کورس مکمل کیا ہے وہ اساتذہ بحالی میں نااہل قرار دیے جائیں گے۔ اس اعلان کے بعد سے ارریہ میں ڈی ایل ایڈ کرنے والے ہزاروں طلباء کا مستقبل تاریک نظر آنے لگا ہے۔
اسی ضمن میں آج ارریہ کے درجنوں مشتعل طلباء نے شہر کے چاندنی چوک پر وزیر اعلیٰ نتیش کمار اور وزیر تعلیم کا پتلا نذر آتش کیا اور حکومت پر اساتذہ مخالف الزام عائد کرتے ہوئے نعرے بازی کی۔
طلباء کا کہنا ہے کہ 'موجودہ حکومت نے ہمارے ساتھ دوہرا رویہ اختیار کر رہی ہے. جبکہ ہماری ڈگری مرکزی حکومت کے شعبہ ایچ آر ڈی کے حکم پر روک لگائی گئی ہے، کیونکہ 21 اگست 2019 سے قبل کے تمام ٹی ای ٹی اردو پاس طلباء کو بی ایڈ یا ڈی ایل ایڈ کرا دینا تھا، اسی وجہ سے مرکزی تعلیمی وزارت کے حکم پر این آئی او ایس نے اسپیشل کورس 18 مہینے میں مکمل کروایا اور مارکشیٹ بھی دی جو پورے ملک میں کہیں بھی اساتذہ بحالی کے لئے اہل ہے۔
طلباء نے مزید بتایا کہ 'اس کے باوجود موجودہ حکومت ہزاروں بے روزگار طلباء کے مستقبل کے ساتھ کھلواڑ کر رہی ہے، یہی نہیں ہماری ڈی ایل ایڈ ڈگری کو نااہل قرار دے کر آنے والے اساتذہ بحالی سے دور رکھا گیا. ایک طرف جہاں نتیش کمار اساتذہ کے حقوق کی بات کرتی ہے وہیں دوسری جانب سوتیلا سلوک کیا جاتا ہے. نتیش کمار کے اس دوہرے معیار کو تمام اساتذہ دیکھ رہے ہیں۔
