بی جے پی کے قومی صدر جگت پرکاش نڈا نے آج بہار کے وزیراعلیٰ نتیش کمار سے ملاقات کی جبکہ نڈا دو روزہ دورہ پر کل بہار پہنچے تھے۔
دونوں رہنماؤں کے درمیان سیٹوں کی تقسیم پر بات چیت ہوئی۔ اس میٹنگ میں بی جے پی صدر کے ہمراہ نائب وزیراعلیٰ سشیل مودی اور ریاستی بی جے پی انچارج بھوپندر یادو بھی موجود تھے۔
اطلاعات کے مطابق ٹکٹوں کی تقسیم سے متعلق بی جے پی نے ایک تجویز پیش کی ہے۔ بتایا جاتا ہے کہ گذشتہ لوک سبھا انتخابات کے دوران اس وقت کے بی جے پی صدر امت شاہ نے اسمبلی انتخابات میں جے ڈی یو کو زیادہ ٹکٹیں دینے سے اتفاق کیا تھا جبکہ اس مسئلہ پر لالن سنگھ اور بھوپندر یادو کے درمیان بات چیتکا سلسلہ جاری ہے۔
ذرائع کے مطابق نڈا اور نتیش کے درمیان ہوئی بات چیت میں چراغ پاسوان کے موقف اور جتن رام مانجھی کی این ڈی اے میں شمولیت سے متعلق بھی غور و خوص کیا گیا۔
مرکزی وزیر رام ولاس پاسوان کی لوک جن شکتی پارٹی نے جے ڈی یو کے خلاف سخت موقف اختیار کیا ہوا ہے اور انتخابات میں اپنے امیداوروں کو میدان میں اتارنے کی دھمکی دی ہے۔ سیاسی حلقوں میں نتیش اور نڈا کی ملاقات کو کافی اہمیت دی جارہی ہے۔
