نائب امیر شریعت کی نامزدگی پر میری طرف منسوب تحریر غلط: صدر مفتی امارت شرعیہ

امارت شرعیہ کے صدر مولانا سہیل احمد قاسمی کی جانب منسوب کردہ ایک خط سوشل میڈیا پر تیزی سے وائرل ہوا ہے، جس میں نائب امیر شریعت بنائے جانے کے پیش نظر کئی سوالات کھڑے کئے گئے ہیں، جو موضوع بحث ہے، حالانکہ مولانا سہیل احمد قاسمی نے اپنی طرف منسوب اس تحریر کو غلط قرار دیا ہے۔

پٹنہ: امارت شرعیہ کے صدر مفتی حضرت مولانا سہیل احمد قاسمی کی جانب منسوب کردہ ایک خط بنام مولانا رضوان احمد قاسمی منورا شریف سمستی پور کا سوشل میڈیا پر آج وائرل ہوا ہے، جس میں نائب امیر شریعت کی نامزدگی پر کئی سوالات کھڑے کئے گئے ہیں۔

جاری کردہ خط میں مولانا سہیل احمد قاسمی کا نام درج ہے، تاہم اس پر کوئی دستخط نہیں ہے۔ مذکورہ خط وائرل ہونے کے بعد سے موضوع بحث ہے۔


سوشل میڈیا پر جاری کردہ خط کے تعلق سے جب صدر مفتی مولانا سہیل احمد قاسمی سے پوچھا گیا تو انہوں نے صاف طور سے انکار کرتے ہوئے اس سے لاعلمی کا اظہار کیا۔

مولانا سہیل احمد قاسمی نے کہا کہ نائب امیر شریعت کی نامزدگی حضرت امیر شریعت سابع حضرت مولانا ولی رحمانی صاحب نے کیا تھا، ان کے انتقال کے بعد نائب امیر شریعت ہی مثل امیر شریعت ہیں، اس میں کسی کو شک و شبہات نہیں ہونا چاہیے۔

اس لیے سوشل میڈیا پر جو لوگ بھی اس طرح کی تحریر کو وائرل کر رہے ہیں وہ اس سے بعض آئیں، ایسے خطوط ہمارے آپسی اتحاد کمزور کرنے کی کوشش ہے۔