اس احتجاج میں ریاست کے متعدد معروف سماجی کارکنان اور ضلع صدور نے شرکت کی۔بعد ازاں ضلع کلکٹر بیجناتھ یادو کو ایک میمورنڈم ریاست کے وزیر اعلیٰ، گورنر، وزیراعظم اور صدر جمہوریہ کے نام سونپا گیا۔
کانگریس، آر جے ڈی، وی آئی پی، ہندوستانی عوام مورچہ، راشٹریہ لوک سمتا پارٹی ، کمیونسٹ پارٹی کے کارکنان نے ریاستی حکومت کے خلاف زبردست نعرے بازی کی۔
مظاہرہ سے خطاب کرتے ہوئے گرام رکشا دل کے رہنما محمد حاتم نے کہا کہ بہار میں جرائم پیشوں کی دہشت ہے مگر حکومت ان کے سامنے بے بس ہے، حکومت سے سوال کرنے والوں کو ڈرایا دھمکایا جاتا ہے، مرکزی حکومت کے ذریعہ آئے دن آئین پر حملہ ہو رہا ہے جس سے عوام میں غم و غصہ ہے۔
کمیونسٹ پارٹی کی رہنما حلیمہ خاتون نے کہا کہ مرکزی حکومت ملک میں نفرت کا ماحول قائم کرنا چاہتی ہے، ایک زمانے تک رام جنم بھومی اور بابری مسجد پر سیاست کی، ہندو مسلم کے درمیان نفرت کا ماحول قائم کیا، مذہب کے نام پر اکثریت آبادی کو ورغلانے کا کام کیا اس لیے ایسی پارٹی کو اب اکھاڑ پھینکنا ہوگا تاکہ ملک کی سالمیت باقی رہے۔
وی آئی پی پارٹی کے رہنما سریش پہردار نے کہا کہ بہار کی خراب حالت بتا کر اقتدار پر قابض ہونے والے نتیش کمار آج کے بہار کو کس راستے پر لے جا رہے ہیں، جہاں آئے دن عصمت دری کے واقعات رونما ہو رہے ہیں،قتل و غارت اپنے شباب پر ہے، اس لیے اب عظیم اتحاد قومی سطح پر ریاستی و مرکزی حکومت کی ناکامیوں کو اجاگر کرے گی۔
مظاہرہ میں شیام نند سنگھ ضلع صدر وی آئی پی پارٹی، انیل کمار سنہا ضلع صدر کانگریس ، برہما دیو چودھری قومی نائب صدر وی آئی پی پارٹی، رمیش مہتو ضلع صدر آر ایل ایس پی، جتیندر پرساد سنگھ ضلع صدر آر جے ڈی کے علاوہ درجنوں کارکنان نے خطاب کیا۔
