بہار کے گورنر پھاگو چوہان نے منگل کو گورنر ہاﺅس میں منعقدہ ایک تعزیتی جلسہ میں ملک کے 13ویں صدر جمہوریہ بھارت رتن پرنب مکھرجی کو ان کی تصویر پر گل پوشی کر کے انہیں پرخلوص خراج عقیدت پیش کیا۔
اس تعزیتی جلسہ میں گورنر کے پرنسپل سکریٹری چیتنیہ پرساد سمیت گورنر ہاﺅس کے عہدیداران اور ملازمین نے بھی سماجی فاصلے پر مکمل عمل آوری کرتے ہوئے پرنب مکھرجی کی تصویر پور گل پوشی کر کے انہیں خراج عقیدت پیش کیا۔
تعزیتی جلسہ میں دو منٹ کی خاموشی بھی اختیار کی گئی۔گورنر نے خراج عقیدت پیش کرنے کے بعد کہا کہ 'پرنب مکھرجی مادر وطن کے سچے سپوت، ایک اسکالر اور محبوب سیاست داں، ماہرمعاشیات تھے۔ جن کے انتقال سے پورے ملک کو ناقابل تلافی نقصان ہواہے۔ وہ سیاست کی دنیا میں تاعمر 'اجات شترو' بنے رہے، جنہیں سبھی سیاسی جماعتوں کے لیڈران قدر کی نگاہ سے دیکھتے ہیں۔ بہار کی ہمہ جہت ترقی کیلئے بھی وہ ہمیشہ اپنی رہنمائی فراہم کرتے رہتے تھے'۔
